Ministri i Mbrojtjes i Arabisë Saudite, Khalid bin Salman, ka paralajmëruar se nëse presidenti amerikan Donald Trump nuk e çon deri në fund kërcënimin për të goditur Iranin, atëherë regjimi i Teheranit vetëm sa do të dalë më i fortë.
Deklaratat u bënë gjatë një takimi me dyer të mbyllura të zhvilluar mbrëmjen e kaluar në Uashington dhe janë raportuar nga Axios, duke cituar katër burime të pranishme në takim.
Sipas burimeve, bin Salman theksoi se pas kërcënimeve të përsëritura të Trump ndaj Iranit, presidenti amerikan do të detyrohej përfundimisht të ndërmerrte veprime ushtarake, ndërkohë që do të kërkonte të minimizonte rrezikun e përshkallëzimit rajonal, përcjell Ynet.
Ai shtoi gjithashtu se aktualisht nuk është i qartë për strategjinë apo synimet e administratës Trump ndaj Iranit.
Takimi, i cili zgjati rreth një orë, përfshinte rreth 15 ekspertë të Lindjes së Mesme nga institute kërkimore, si dhe përfaqësues të pesë organizatave hebraike. Dy burime thanë se ministri saudit kishte përcjellë të njëjtin mesazh edhe gjatë takimeve që zhvilloi një ditë më parë në Shtëpinë e Bardhë.
Gjatë këtyre takimeve, bin Salman u takua me Sekretarin amerikan të Shtetit Marco Rubio, Sekretarin e Mbrojtjes Pete Hegseth, të dërguarin e Trump, Steve Witkoff, si dhe me Shefin e Shtabit të Përbashkët, gjeneralin Dan Caine.
Një burim i njohur me përmbajtjen e diskutimeve tha se fokusi kryesor ishte mundësia e një sulmi amerikan ndaj Iranit.
Ndërkohë, më herët gjatë së premtes, presidenti iranian Masoud Pezeshkian bëri thirrje për “dëgjimin e protestuesve paqësorë”, por akuzoi “ata që duan të shfrytëzojnë valën e protestave për të përçarë vendin dhe për të nxitur trazira”.
Ai deklaroi: “Ne jemi të përkushtuar të ecim në rrugën e drejtësisë dhe të qëndrojmë si mur kundër atyre që presin t’i bëjnë keq popullit iranian, nga brenda vendit dhe nga jashtë.”
Nga ana e tij, ministri i Jashtëm iranian Abbas Araghchi tha se “aktualisht nuk ka bazë serioze për negociata. Që bisedimet të jenë reale dhe produktive, fillimisht duhet të hiqet atmosfera e kërcënimeve dhe presionit. Nëse ndodh ndonjë sulm, përgjigjja jonë do të jetë e ashpër dhe shumë e fuqishme.”
Në fillim të kësaj jave, në sfondin e kërcënimeve të Trump, Princi i Kurorës i Arabisë Saudite, Mohammed bin Salman, zhvilloi një bisedë telefonike me presidentin Pezeshkian, ku i tha se Arabia Saudite nuk do të lejonte përdorimin e territorit, tokës apo hapësirës së saj ajrore për një sulm ndaj Teheranit.
Një qëndrim të ngjashëm e kishte shprehur dy ditë më parë edhe Emiratet e Bashkuara Arabe.
Vetë Trump deklaroi të premten në mbrëmje se Republika Islamike dëshiron një marrëveshje. “Mund ta them këtë: ata duan të bëjnë një marrëveshje. Shpresoj që të ndodhë,” tha Trump para gazetarëve në Shtëpinë e Bardhë, duke paralajmëruar gjithashtu: “Nëse nuk ka marrëveshje, do të shohim se çfarë ndodh.”
I pyetur nëse Teherani ka një afat për të arritur një marrëveshje, ai u përgjigj: “Vetëm ata e dinë me siguri. Unë ua kam përcjellë mesazhin.”
Ndërkohë, media opozitare iraniane Iran International raportoi të premten, duke cituar një burim perëndimor të pranishëm në takime mes zyrtarëve amerikanë dhe izraelitë, se vlerësimi që po formohet është se një sulm amerikan ndaj Iranit pritet të ndodhë së shpejti.
Sipas këtij burimi, çështja nuk është nëse do të ketë një sulm, por kur.
“Vendimi është marrë dhe tani po pritet një mundësi e përshtatshme operacionale, e cila mund të shfaqet brenda ditësh ose ndoshta javësh,” tha ai.
Burimi shtoi se, ndryshe nga e kaluara, qëllimi i një sulmi të tillë këtë herë nuk është arritja e një marrëveshjeje të re me Iranin, por dobësimi i thellë i regjimit deri në pikën e shembjes.
Për këtë arsye, po planifikohet një lloj sulmi krejtësisht i ndryshëm, si në shkallë ashtu edhe në intensitet. “Këtë herë do të jetë një sulm i paprecedentë,” theksoi ai.
Ai shtoi se gjatë shkëmbimeve të zjarrit në të ashtuquajturën “luftë 12-ditore”, Izraeli dhe Shtetet e Bashkuara shmangën marrjen e rreziqeve të mëdha, por tani situata ka ndryshuar.
Sipas vlerësimit të tij, Uashingtoni dhe Jerusalemi e shohin momentin aktual si një mundësi të rrallë dhe janë të gatshëm të marrin rreziqe shumë më të mëdha.
Nëse Izraeli përfshihet në këtë veprim – dhe sipas burimit ekzistojnë plane për një përfshirje të tillë – atëherë shkalla dhe intensiteti i sulmit do të ishte edhe më i gjerë.
