Departamenti i Drejtësisë i Shteteve të Bashkuara ka hapur një hetim penal ndaj Guvernatorit të Minesotës, Tim Walz, dhe Kryetarit të Bashkisë së Minneapolis, Jacob Frey. Një juri e madhe federale ka lëshuar fletëthirrje ndaj tyre në kuadër të këtij hetimi.
Sipas raportimeve mediatike, që citojnë burime të njohura me çështjen, Walz, Frey dhe zyrtarë të tjerë dyshohet se kanë bashkëpunuar për të penguar veprimtarinë e agjentëve federalë të imigracionit të dislokuar në shtet, si pjesë e politikave të ashpra të administratës së Presidentit Donald Trump kundër imigracionit të paligjshëm.
Administrata Trump ka dislokuar rreth 3,000 agjentë federalë në Minesota që nga fillimi i javës së kaluar, çka ka shkaktuar protesta në Minneapolis për shkak të intensifikimit të zbatimit të ligjit të imigracionit në qytetin më të madh të shtetit. Presidenti Trump nisi një fushatë të gjerë kundër imigracionit të paligjshëm pas rikthimit në Shtëpinë e Bardhë në janar 2025, duke e cilësuar atë si përpjekjen më të madhe të dëbimit në historinë e SHBA-së.
Tensionet u rritën më tej pas vrasjes së një banoreje lokale, Renee Good, nga një agjent i Emigracionit dhe Doganave (ICE) në Minneapolis javën e kaluar, ngjarje që nxiti protesta të përditshme dhe përhapje të tyre edhe jashtë shtetit. Si guvernatori Walz ashtu edhe kryebashkiaku Frey kanë kritikuar ashpër praninë federale në qytet.
Walz, i cili ishte kandidat për zëvendëspresident në zgjedhjet presidenciale të vitit 2024 në krah të Kamala Harris, ka akuzuar qeverinë federale për politizim të sistemit të drejtësisë dhe kërcënim të kundërshtarëve politikë. Ai ka deklaruar se hetimi përbën një precedent të rrezikshëm dhe ka vënë në dukje se agjenti federal i përfshirë në vrasjen e Renee Good nuk është subjekt i hetimit.
Në një reagim të veçantë, Frey e cilësoi hetimin si një përpjekje për ta frikësuar për shkak të qëndrimit të tij kundër operacionit federal të imigracionit, duke theksuar se ai ka vepruar në mbrojtje të qytetit dhe banorëve të tij, shkruan Rt.
Ndërkohë, shteti i Minesotës, së bashku me qytetet Minneapolis dhe Saint Paul, kanë ngritur padi kundër administratës Trump, duke argumentuar se operacioni federal i imigracionit përbën shkelje të të drejtave të shteteve sipas Amendamentit të Dhjetë të Kushtetutës së SHBA-së.
Autoritetet federale planifikojnë dislokimin e rreth 1,000 agjentëve shtesë të Mbrojtjes së Doganave dhe Kufirit në Minneapolis, duke e çuar praninë federale në rreth 3,000. Partia Demokratike ka dënuar bastisjet e ICE-së, duke i cilësuar ato si abuzim me pushtetin dhe fajësim të emigrantëve për problemet e sigurisë.
