Shirat e rrëmbyeshëm goditën Kenian perëndimore këtë fundjavë, duke shkaktuar një rrëshqitje toke të premten vonë që ka vrarë të paktën 21 persona.
Ministri i Brendshëm kenian, Kipchumba Murkomen, tha të shtunën se rreth 30 të tjerë u raportuan të zhdukur nga familjet e tyre në tragjedinë që goditi qarkun Marakwet East.
Operacionet e kërkim-shpëtimit u ndërprenë për natën, me autoritetet që u zotuan të rifillonin kërkimet të dielën në mëngjes.
Rreth 25 persona u plagosën rëndë për shkak të rrëshqitjes së dheut, tha Murkomen në X. Ata u transportuan me helikopter në qytetin perëndimor të Eldoret, ku do të merrnin kujdes mjekësor. Të tjerë me lëndime të lehta u trajtuan në nivel lokal, shtoi ministri.
Rrëshqitja e tokës shkatërroi gjithashtu infrastrukturën, përfshirë rrjetin rrugor, gjë që i ndërlikoi më tej përpjekjet e shpëtimit, shkruan DW.
Helikopterë ushtarakë dhe policorë u dërguan në rajonin e prekur për të ndihmuar me misionin e kërkim-shpëtimit. Murkomen tha se autoritetet po bënin përgatitje për t’u siguruar ndihma viktimave dhe për të rivendosur rrjetin rrugor.
“U bëj thirrje njerëzve që jetojnë pranë lumenjve sezonalë dhe zonave që përjetuan rrëshqitje toke mbrëmë që të zhvendosen në vende më të sigurta”, shkroi Murkomen.
Përmbytje të mëdha e kanë goditur Kenian disa herë vitet e fundit, duke shkaktuar qindra vdekje dhe shkatërrime të konsiderueshme. Shkencëtarët fajësojnë ndryshimet klimatike për ngjarje të tilla të shpeshta ekstreme të motit.
