I dërguari i posaçëm amerikan, Steve Witkoff, zhvilloi të shtunën një takim të tensionuar me familjarët e pengjeve izraelite në “Sheshin e Pengjeve” në Tel Aviv.
Megjithëse takimi zgjati mbi dy orë, të afërmit e pengjeve u larguan të zhgënjyer dhe skeptikë, duke thënë se nuk morën asnjë lajm konkret për përparimin e bisedimeve.
Takimi u zhvillua vetëm pak kohë pas publikimit të videove tronditëse që tregonin Rom Braslavski dhe Evyatar David në gjendje jashtëzakonisht të rënduar pas 666 ditësh në robëri të Hamasit.
“Shumica e izraelitëve duan kthimin e pengjeve në shtëpi,” u tha Witkoff të pranishmëve. “Edhe shumica e banorëve të Gazës duan kthimin e pengjeve – ata duan që Gaza të rindërtohet.”
Ai shtoi se përpjekjet për arritjen e një marrëveshjeje për lirimin e të 50 pengjeve që mbeten ende në Gaza, si dhe për t’i dhënë fund luftës, janë në vazhdim, përcjell Ynet.
Por për shumë nga familjarët e pranishëm, këto fjalë nuk përfaqësonin një përparim të vërtetë.
“Nuk prisja asgjë nga ky takim,” tha një prej të afërmve. “Ai po përsërit slogane—‘Hamas nuk do marrëveshje’. E pyeta: Kanë kaluar tetë muaj nga deklarata e Trump, tre muaj nga vizita jote e fundit, dhe situata është përkeqësuar. Ai thotë që janë të përkushtuar dhe po bëjnë gjithçka që munden. Vetëm slogane. Me 50 veta në dhomë, nuk ka vend për dialog të vërtetë.”
Një pjesëmarrës tjetër e përshkroi takimin si një “mundësi për familjet që të shfryjnë tensionet.” Sipas tij, Witkoff foli për përpjekjet e administratës, “por nuk kishte asnjë informacion konkret.”
Takimi u mbajt në një atmosferë të ngarkuar në “Sheshin e Pengjeve”, ku familjarët kishin ngritur edhe instalime me tela me gjemba për të simbolizuar vuajtjen e atyre që mbeten ende në duart e Hamasit. Publikimi i videove të fundit – të lejuara për publikim vetëm me pëlqimin e familjeve – ka rritur ndjeshëm tensionet në të gjithë Izraelin.
Takimi me Witkoff vjen në një moment kritik për Izraelin, ndërsa presioni publik për arritjen e një marrëveshjeje për lirimin e pengjeve po rritet nga dita në ditë. Megjithatë, shumë prej familjeve të pengjeve shprehen se fjalët e diplomatëve nuk mjaftojnë më.
