Ditën e sotme u zhvillua në gjykatën Kushtetuese seanca e radhës përsa i përket ligjit për Teatrin.
Në këtë seancë, gjykata ka tërhequr vëmendjen ndaj përfaqësuesve të qeverisë pasi nuk kanë paraqitur në afatin e duhur provat e kërkuara nga presidenca.
“Ju dhamë kohë qeverisë për të sjellë dokumente. Nuk i sollën në afatet e përcaktuara nga gjykata. Edhe Presidencës ia kemi përcjellë jashtë afatit. Tërheqim vëmendjen e të gjithëve për mosrespektimin e afateve.”- kanë thënë gjykatësit, citon Balkanweb.
Nga ana tjetër përfaqësuesi ligjor i presidencës, Bledar Dervishaj, është shprehur se nuk janë administruar provat që ka kërkuar Presidenti i Republikës.
“Rezulton se nuk janë administruar të gjitha provat që kërkoi Presidenti i Republikës.”- tha Dervishaj.
Kështu kjo seancë është shtyrë për ditën e nesërme në orën 10:00, pasi gjyqtarët kanë pranuar si provë, vendimin e Këshillit Bashkiak, për prishjen e Teatrit.
