Mbi 1 mijë shkolla në Angli dhe Uells janë mbyllur ose kanë vendosur të mbyllen më herët këtë javë, ndërsa Mbretëria e Bashkuar po përballet me një valë të fortë të nxehti.
Autoritetet meteorologjike parashikojnë që temperaturat në jug të Anglisë të arrijnë deri në 37 gradë Celsius, ndërsa temperatura e perceptuar mund të jetë edhe më e lartë për shkak të lagështisë dhe mungesës së erës.
Met Office ka zgjeruar paralajmërimin e kuq për nxehtësi ekstreme, niveli më i lartë i alarmit, i cili tashmë mbulon një pjesë më të madhe të jugut të Anglisë dhe do të mbetet në fuqi deri në orën 23:59 të së enjtes.
Sipas autoriteteve, ekziston rrezik serioz për shëndetin dhe jetën e qytetarëve, veçanërisht për të moshuarit dhe grupet vulnerabël. Paralajmërimi përfshin gjithashtu vonesa të mundshme në transport dhe ndërprerje të shërbimeve.
Operatorët hekurudhorë u kanë bërë thirrje qytetarëve të shmangin udhëtimet jo të domosdoshme, ndërsa një paralajmërim i ri portokalli për temperatura të larta është lëshuar edhe për të shtunën në jug dhe lindje të Anglisë.
Autoritetet shëndetësore këshillojnë qytetarët të qëndrojnë të hidratuar, të veshin rroba të lehta dhe të shmangin ekspozimin e gjatë në diell gjatë orëve më të nxehta të ditës.
