Shtetet e Bashkuara dhe Irani po përgatiten për një përshkallëzim të ri të tensioneve ushtarake, ndërsa të dyja palët kanë lëshuar paralajmërime të forta për veprime gjatë orëve në vijim.
Sipas mediave iraniane, forcat e armatosura të Iranit janë vendosur në gatishmëri të plotë dhe kanë paralajmëruar se do të godasin objektiva të rinj amerikanë nëse Uashingtoni ndërmerr sulme të tjera ushtarake.
Agjencia iraniane “Tasnim”, duke cituar një burim ushtarak, raportoi se çdo veprim agresiv nga SHBA do të përballet me një përgjigje të ashpër. Sipas raportimeve, ushtria iraniane është përgatitur për zhvillime të mundshme gjatë natës.
Ndërkohë, agjencia “Mehr” njoftoi se sistemet e mbrojtjes ajrore janë aktivizuar në provincën Fars. Mediat iraniane raportuan gjithashtu për zhurma të largëta në ishullin Kish, në Gjirin Persik, megjithëse burimi i tyre nuk është bërë i ditur.
Nga ana tjetër, Sekretari amerikan i Mbrojtjes, Pete Hegseth, deklaroi se Komanda Qendrore e SHBA-së do të ketë një natë të ngarkuar, duke lënë të kuptohet se mund të ketë operacione të tjera ushtarake kundër Iranit.
Ai paralajmëroi se Shtetet e Bashkuara do ta godasin Iranin me forcë, duke synuar objekte që konsiderohen strategjike. Sipas tij, sulmet do të jenë të qarta dhe të fuqishme, me qëllim mbrojtjen e interesave amerikane dhe forcimin e pozicionit diplomatik të Uashingtonit.
Hegseth pretendoi gjithashtu se shumica e raketave iraniane nuk arrijnë objektivat e tyre të synuara.
Situata mbetet tepër e tensionuar, ndërsa vëmendja ndërkombëtare është përqendruar te zhvillimet e orëve të ardhshme, të cilat mund të përcaktojnë drejtimin e mëtejshëm të përplasjes mes Uashingtonit dhe Teheranit.
