Ekipet e shpëtimit në Laos kërkuan të hënën një kalim alternativ për në një shpellë të përmbytur ku besohet se dy persona kanë mbetur të bllokuar për gati dy javë pasi reshjet e dendura të shiut përmbytën hyrjen kryesore, duke e bërë atë të pakalueshme.
Dy personat mbeten të zhdukur që kur një operacion kërkim-shpëtimi filloi muajin e kaluar në një zonë të thyer të provincës Xaisomboun, rreth 120 kilometra (75 milje) në veri të kryeqytetit, Vientiane. Pesë nga shtatë personat e bllokuar fillimisht brenda shpellës janë shpëtuar .
Zhytësi malajzian Lee Kian Lie, i cili është i përfshirë në operacion, tha se punëtorët po pomponin ujë nga shpella.
“Ne do të shkojmë në zonën e dyshuar për të vazhduar kërkimin nëse niveli i ujit ulet”, tha ai për Associated Press.
Një ekip tjetër shpëtimtarësh po kërkon gjithashtu në anën tjetër të shpellës me shpresën për të gjetur një kalim të thatë që mund të sigurojë qasje në zonën ku besohet se janë të bllokuar personat e zhdukur, tha ai.
Ekipet e shpëtimit nga Laosi dhe Tailanda fqinje kanë punuar së bashku për më shumë se një javë. Atyre iu bashkuan zhytës nga vende si Finlanda, Malajzia, Japonia, Indonezia, Franca dhe Australia.
