Katër persona mbetën të plagosur të dielën në mbrëmje pasi një dron i Hezbollahut shpërtheu pranë komunitetit Beit Hillel në veri të Izraelit, në një tjetër incident që rrit tensionet përgjatë kufirit me Libanin pavarësisht armëpushimit të arritur muajin e kaluar.
Sipas raportimeve, një nga të plagosurit ndodhet në gjendje të mesme, ndërsa tre të tjerët kanë pësuar lëndime të lehta, përcjell Ynet.
Më herët gjatë ditës, sirenat e alarmit ajror u aktivizuan në qytetin verior Ma’alot, për herë të parë që nga hyrja në fuqi e armëpushimit. Alarme u dëgjuan gjithashtu në mënyrë të përsëritur në Kiryat Shmona dhe Safed, duke detyruar banorët të strehoheshin në hapësirat e mbrojtura.
Sipas ushtrisë izraelite, disa raketa ranë në zona të hapura, ndërsa të tjera u interceptuan nga sistemet e mbrojtjes ajrore. Forcat e Mbrojtjes së Izraelit raportuan gjithashtu se një “objekt ajror i dyshimtë” u rrëzua pranë Beit Hillel.
Alarmet u aktivizuan gjatë ditës edhe në Nahariya, Acre dhe në zonën e Gjirit të Haifës. Ndërkohë, një zjarr shpërtheu në rezervatin natyror Tel Dan.
Kryeministri izraelit Benjamin Netanyahu deklaroi se siguria do të rikthehet për banorët e veriut të vendit, por paralajmëroi se procesi do të kërkojë kohë.
“Do të duhet edhe pak kohë,” tha Netanyahu, pasi ushtria njoftoi marrjen nën kontroll të Kalasë Beaufort në Libanin jugor, një zhvillim që ai e përshkroi si “një fazë dramatike dhe një ndryshim dramatik të politikës.”
Për shkak të situatës së sigurisë, Ministria izraelite e Arsimit njoftoi shtyrjen e provimeve të maturës në komunitetet veriore të prekura nga tensionet.
Të gjitha provimet e planifikuara nga 31 maji deri më 5 qershor janë anuluar në zonat kufitare dhe në disa qytete të tjera të veriut, përfshirë Karmiel, Acre dhe Safed.
Sipas ministrisë, provimi i historisë i planifikuar për 1 qershor nuk do të zhvillohet dhe nota përfundimtare e nxënësve do të bazohet në vlerësimet e shkollës. E njëjta masë do të zbatohet edhe për provimin e gjuhës arabe të planifikuar për 2 qershor.
Ndërkohë, provimet me zgjedhje të nivelit të avancuar të planifikuara për 4 qershor janë shtyrë për një datë të mëvonshme, ndërsa autoritetet arsimore do të njoftojnë së shpejti kalendarin e ri.
“Nuk ka provime mature nën zjarr. Kjo është politika ime,” deklaroi ministri i Arsimit, Yoav Kisch.
“Provimet e maturës janë për të testuar njohuritë, aftësitë dhe arritjet akademike, jo aftësinë për të përballuar ankthin dhe sigurisht jo rrezikun ndaj sigurisë,” shtoi ai.
Autoritetet izraelite kanë bërë të ditur se vendimet për pjesën e mbetur të sezonit të provimeve do të merren javë pas jave, në varësi të zhvillimeve të situatës së sigurisë në veri të vendit.
