Organizata Botërore e Shëndetësisë ka paralajmëruar se shpërthimi i Ebolës në Republikën Demokratike të Kongos po përkeqësohet nga konflikti i armatosur në lindje të vendit, duke krijuar një “përplasje katastrofike mes sëmundjes dhe luftës”.
Drejtori i përgjithshëm i OBSH-së, Tedros Adhanom Ghebreyesus, deklaroi se provinca Ituri është kthyer në epiqendrën e krizës, ndërsa përhapja e virusit po ecën më shpejt sesa reagimi i autoriteteve shëndetësore, përcjell BBC.
“Nuk mund të ndërtojmë besimin e komunitetit apo të izolojmë të sëmurët ndërsa bombat po bien”, shkroi Tedros në rrjetin X.
Sipas të dhënave të fundit, deri tani janë raportuar 220 viktima të dyshuara nga Ebola, ndërsa rreth 1 mijë persona shfaqin simptoma të ngjashme me virusin. Megjithatë, vetëm 17 raste janë konfirmuar zyrtarisht përmes analizave laboratorike.
OBSH paralajmëroi se përplasjet mes grupeve të armatosura kanë detyruar mijëra njerëz të zhvendosen drejt kampeve të mbipopulluara, duke vështirësuar izolimin e rasteve dhe gjurmimin e kontakteve.
“Punonjësit në vijën e parë po rrezikojnë gjithçka, ndërsa sulmet ndaj qendrave shëndetësore e bëjnë pothuajse të pamundur gjurmimin e rasteve dhe kontakteve të tyre”, tha Tedros.
Ai u bëri thirrje të gjitha palëve në konflikt që të bien dakord për një armëpushim të menjëhershëm, në mënyrë që ekipet mjekësore të kenë akses të sigurt në zonat e prekura.
Ndërkohë, organizata Médecins Sans Frontières paralajmëroi se duhen javë të tëra për të ngritur infrastrukturën e nevojshme për kontrollin e epidemisë.
Drejtori i MSF në Kongo, Ewald Stals, tha për BBC se situata mbetet jashtë kontrollit.
“Virusi është ende përpara nesh dhe ne duhet ta kapim ritmin”, deklaroi ai.
Kjo valë e Ebolës është shkaktuar nga varianti i rrallë Bundibugyo, për të cilin aktualisht nuk ekzistojnë vaksina apo ilaçe të miratuara.
Autoritetet shëndetësore po përpiqen të gjurmojnë rreth 3,600 kontakte të personave të infektuar, ndërsa mijëra teste dhe trajtime eksperimentale pritet të mbërrijnë në zonë.
