Stellantis njoftoi se do të investojë 60 miliardë euro dhe do të lançojë 60 modele të reja automjetesh deri në fund të dekadës, ndërsa drejtori i përgjithshëm Antonio Filosa prezantoi strategjinë e tij për të ringjallur prodhuesin e makinave.
Sipas planit të ri pesëvjeçar të publikuar të enjten, grupi europian i automobilave deklaroi se do të mbajë të hapura të gjitha fabrikat e tij, pavarësisht kërkesës së dobët në disa vende. Kompania shtoi gjithashtu se do të bashkëpunojë me Leapmotor dhe prodhues të tjerë kinezë, si pjesë e strategjisë për të ruajtur të gjitha 14 markat e saj.
Rreth 70 për qind e investimeve do të përqendrohen te markat Jeep, Ram, Peugeot dhe Fiat, ndërsa nga 60 modelet e reja, 29 do të jenë plotësisht elektrike. Megjithatë, aksionet e kompanisë në bursën e Milanos ranë me më shumë se 5 për qind pas publikimit të planit, duke reflektuar zhgënjimin e investitorëve që prisnin një ristrukturim më radikal.
Strategjia afatgjatë është e para nën drejtimin e Filosa-s, i cili mori detyrën në qershor, me synimin për të rikthyer grupin që ka humbur terren në tregjet europiane dhe amerikane përballë konkurrencës së ashpër dhe politikave agresive të çmimeve që larguan konsumatorët. Më herët këtë vit, kompania kishte njoftuar një humbje prej 22 miliardë eurosh të lidhur me zgjerimin agresiv në automjetet elektrike.
Filosa deklaroi se synon rritje fitimprurëse afatgjatë përmes bashkëpunimit me rivalë si Dongfeng Motor Corporation, Tata Motors dhe Jaguar Land Rover.
Stellantis do të fokusohet fillimisht në zgjerimin dhe fitimprurësinë e katër markave të saj kryesore globale, përpara se investimet të shpërndahen edhe te markat rajonale si Chrysler, Citroën, Dodge, Opel dhe Alfa Romeo.
Grupi konfirmoi gjithashtu se marka luksoze Maserati do të shtojë dy modele të elektrifikuara, duke hedhur poshtë spekulimet se kompania mund ta shiste markën italiane që aktualisht rezulton me humbje.
Këtë javë, Stellantis njoftoi krijimin e një sipërmarrjeje të përbashkët me Dongfeng për prodhimin e automjeteve elektrike premium të kompanisë kineze në fabrikat e saj me kapacitet të pashfrytëzuar në Francë. Kompania gjithashtu ka zgjeruar partneritetin me Leapmotor, në kuadër të të cilit një nga dy fabrikat e saj në Spanjë do t’i transferohet prodhuesit kinez.
Filosa, i cili zëvendësoi ish-drejtorin e Peugeot, Carlos Tavares, po drejton gjithashtu një plan investimesh prej 13 miliardë dollarësh në Amerikën e Veriut, pas një rënieje shtatëvjeçare të shitjeve në SHBA, e përkeqësuar nga rritja e çmimeve dhe mbiprodhimi.
Ai ka rikthyer fokusin te preferencat e konsumatorëve amerikanë të tregut masiv, duke hequr dorë nga disa modele hibride plug-in dhe duke rikthyer modele të njohura si Jeep Cherokee, i cili ishte ndërprerë nën drejtimin e Tavares, si dhe motorin e famshëm 5.7-litërsh “Hemi” V8 në kamionçinën Ram 1500.
Rikthimi i biznesit në SHBA konsiderohet jetik për Stellantis, i cili po përballet me rënie globale të shitjeve për shkak të konkurrencës së fortë nga prodhuesit kinezë në Europë dhe Amerikën Latine, si dhe kostove të larta të tranzicionit drejt automjeteve elektrike.
Stellantis deklaroi se, përmes modeleve të reja dhe partneriteteve strategjike, synon të rrisë përdorimin e kapaciteteve të fabrikave të saj në Europë dhe SHBA në 80 për qind deri në vitin 2030. Gjithashtu, kompania planifikon të ulë ciklin e zhvillimit të automjeteve të reja nga 40 muaj në 24 muaj, ndërsa prodhuesit tradicionalë përpiqen të rivalizojnë shpejtësinë e kompanive kineze në nxjerrjen e produkteve të reja në treg.
Në tremujorin e parë të vitit, Stellantis raportoi një fitim neto prej 377 milionë eurosh, duke rikuperuar nga humbja prej 387 milionë eurosh në të njëjtën periudhë të vitit 2025, falë rritjes së kërkesës në Amerikën e Veriut për markat Jeep dhe Ram.
VINI RE: Ky material është pronësi intelektuale e Financial Times
