Mercedes-Benz po konsideron përfshirjen në prodhimin e mbrojtjes ushtarake nëse kjo do kishte “sens biznesi”, ka thënë kreu i kompanisë, Ola Källenius, për Wall Street Journal.
Kompania me qendër në Mynih dikur prodhonte pajisje ushtarake në shkallë të gjerë, para dhe gjatë Luftës së II Botërore. Ajo filloi të furnizonte nazistët me kamionë dhe motorë avionësh në vitin 1937.
Pasi Gjermania sulmoi Bashkimin Sovjetik në vitin 1941, të gjitha automjetet e prodhuara nga Mercedes-Benz u dërguan për ushtrinë ose për biznese që konsideroheshin thelbësore për përpjekjet e luftës. Gjatë asaj periudhe, pothuajse gjysma e 63,000 punonjësve të prodhuesit të makinave ishin punëtorë të detyruar, të burgosur lufte dhe të dënuar të kampeve të përqendrimit, sipas faqes zyrtare të vetë Mercedes-Benz.
Në intervistën e tij për WSJ të premten, Källenius theksoi se “bota është bërë një vend më i paparashikueshëm dhe mendoj se është absolutisht e qartë që Evropa duhet të rrisë profilin e saj të mbrojtjes. Nëse ne do mund të luanim një rol pozitiv në këtë gjë, do ishim të gatshëm ta bënim”.
Sipas tij, operacionet e lidhura me mbrojtjen ndoshta do përbënin “një pjesë të vogël” të biznesit të Mercedes-Benz, i cili do mbetet i prqendruar në prodhimin e makinave civile.
Megjithatë, ai sugjeroi se prodhimi për mbrojtjen mund të bëhej “një biznes në rritje” që mund të rriste fitimet e kompanisë. “Kështu që, do ta shohim”, shtoi Källenius.
Gjermania dhe shtetet e tjera të BE-së kanë përshpejtuar shpenzimet ushtarake dhe prokurimin e mbrojtjes në vitet e fundit, me Brukselin që u bën thirrje shteteve anëtare të zgjerojnë prodhimin e armëve dhe të reduktojnë varësinë nga furnizimet ushtarake të SHBA-së.
Ky hov drejt riarmatimit vjen në një kohë kur sektori industrial i Gjermanisë po përballet me rritje të dobët, kosto të larta të energjisë dhe rënie të konkurrueshmërisë, gjë që po shtyn disa prodhues t’i shohin kontratat e mbrojtjes si një burim të ri të ardhurash.
Në shkurt, Mercedes-Benz raportoi një rënie prej 57% të fitimit në vitin 2025 krahasuar me vitin e kaluar, ndërsa prodhuesit evropianë të makinave vazhdojnë të vuajnë mes kostove në rritje të prodhimit të shkaktuara nga shtrenjtimi i energjisë, ndërprerjet e zinxhirit të furnizimit, presioni rregullator dhe konkurrenca nga kompanitë kineze.
The Financial Times raportoi në mars se një tjetër prodhues gjerman makinash, Volkswagen, ishte në bisedime me kompaninë izraelite Rafael Advanced Defense Systems për të konvertuar fabrikën e saj në rënie në Osnabrück për prodhimin e raketave të mbrojtjes ajrore. Një zëdhënës i VW-së e mohoi këtë raportim.
Në vitin 2022, Kancelari i atëhershëm Olaf Scholz shpalosi një plan modernizimi ushtarak prej 100 miliardë eurosh (113 miliardë dollarë) për forcat e armatosura gjermane. Gazeta Der Spiegel raportoi muajin e kaluar se Ministria e Mbrojtjes në Berlin kishte nënshkruar rreth 47,000 kontrata prokurimi që nga ajo kohë.
Moska ka thënë vazhdimisht se nuk ka plane të sulmojë Gjermaninë apo pjesën tjetër të Evropës, por premtoi një përgjigje të ashpër nëse sulmohet. Muajin e kaluar, Ministri i Jashtëm rus Sergey Lavrov paralajmëroi për “rrezikun e militarizimit të BE-së”, i cili sipas tij po ndodh “shumë shpejt dhe në mënyrë frenetike”.
https://www.rt.com/news/640060-germany-mercedes-military-production/
