Kryeministri Edi Rama është takuar sot me kryeministrin grek Kyriakos Mitsotakis në kuadër të pjesëmarrjes në forumin “Delphi”.
Në një postim, Rama theksoi se mes dy vendeve ekziston një marrëdhënie e veçantë miqësore.
Ai nënvizoi se, pavarësisht sfidave, komunikimi ka qenë gjithmonë i hapur dhe me respekt.
Postimi:
Athinë – Me kryeministrin e Greqisë, Kyriakos Mitsotakis, na lidh një miqësi e posaçme e farkëtuar në rrugën e përbashkët të ambicies për të modernizuar vendet tona dhe për t’i ngritur marrëdhëniet shqiptaro-greke në një nivel të ri.
Përgjatë kësaj rruge jo vetëm momentet më të mira, po edhe ato më të vështirat janë karakterizuar gjithnjë nga komunikimi plot respekt e pa dorashka, ndërkohë që po punojmë për kapërcimin përfundimtar të të gjitha çështjeve të mbartura mes dy shteteve, për të dalë nga ky vit me një marrëveshje të re partneriteti strategjik.
