Japonia ka miratuar një reformë të thellë të rregullave për eksportin e pajisjeve ushtarake, duke i dhënë fund kufizimeve të gjata për shitjen e armëve vdekjeprurëse jashtë vendit, përcjell DW.
Kryeministrja Sanae Takaichi deklaroi se në kushtet aktuale globale, asnjë shtet nuk mund të garantojë i vetëm sigurinë e tij, duke theksuar rëndësinë e bashkëpunimit me partnerë ndërkombëtarë në fushën e mbrojtjes.
Ndryshimi i ri përbën një kthesë të rëndësishme nga parimet pacifiste që kanë udhëhequr politikën japoneze pas Luftës së Dytë Botërore. Më parë, eksportet kufizoheshin në kategori si pajisje shpëtimi, transporti apo mbikëqyrjeje, ndërsa tani lejohet eksporti i një game më të gjerë, përfshirë avionë luftarakë, raketa dhe anije ushtarake, me kusht kontrollin qeveritar.
Sipas qeverisë në Tokio, politika e re nuk ndryshon angazhimin e vendit për të mbetur një komb paqedashës, por synon të forcojë sigurinë kombëtare dhe industrinë vendase të mbrojtjes.
Reforma vjen në një moment kur tensionet rajonale janë në rritje, veçanërisht në raport me Kinën dhe situatën në Detin e Kinës Lindore, pranë Tajvanit.
Vendimi është pritur pozitivisht nga partnerë si Australia dhe vende të tjera, ndërsa ka hasur kritika nga Pekini. Mbështetësit argumentojnë se kjo lëvizje do ta integrojë më tej Japoninë në zinxhirët globalë të furnizimit ushtarak dhe do të rrisë aftësinë e saj mbrojtëse.
Ndërkohë, Japonia ka rritur gradualisht shpenzimet ushtarake, duke synuar nivelin 2% të Prodhimit të Brendshëm Bruto, si pjesë e strategjisë për të përballuar sfidat e sigurisë në rajon.
