Presidenti i SHBA-së, Donald Trump, ka lëshuar një paralajmërim të fortë ndaj Iranit, duke deklaruar se nëse armëpushimi i përkohshëm skadon këtë të mërkurë pa një marrëveshje, veprimet ushtarake do të rinisin menjëherë.
Ndërkohë, një delegacion i lartë amerikan i udhëhequr nga Zëvendëspresidenti JD Vance po udhëton drejt Pakistanit për një raund të dytë bisedimesh, përcjell Ynet.
Armëpushimi pritet të përfundojë të mërkurën në orën 20:00 (sipas kohës lindore në SHBA), ndërsa Irani ende po vlerëson pjesëmarrjen e tij.
Tensionet mbeten të larta për shkak të bllokadës detare amerikane, të cilën Teherani e konsideron shkelje të kushteve të armëpushimit, veçanërisht pas konfiskimit të një anijeje tregtare iraniane nga marinsat e SHBA-së.
“Trump i tha PBS-së se nëse armëpushimi me Iranin skadon të mërkurën, ‘atëherë shumë bomba do të nisin të shpërthejnë’”, citohet në lajm.
Pakistani, në rolin e ndërmjetësit, ka propozuar që Uashingtoni të lehtësojë kufizimet detare në portet iraniane, duke i kërkuar në këmbim Teheranit të garantojë lirinë e lundrimit tregtar në Ngushticën e Hormuzit.
Ministri i Jashtëm iranian, Abbas Araghchi, ka zhvilluar biseda telefonike me homologët e tij në Pakistan dhe Rusi për të diskutuar zhvillimet e fundit.
Presidenti Trump u shpreh optimist për bisedimet, duke deklaruar se nuk ka asnjë problem të takojë drejtpërdrejt udhëheqësit iranianë nëse arrihet progres, por mbeti i prerë në kushtin kryesor.
“Hiqni qafe armët e tyre bërthamore. Kjo është e gjitha, shumë e thjeshtë. Nuk do të ketë armë bërthamore”, tha Trump.
I pyetur për pasojat në rast të dështimit të diplomacisë, Trump refuzoi të jepte detaje specifike, por shtoi se “mund ta imagjinoni, nuk do të ishte diçka e bukur”. Delegacioni amerikan, ku bëjnë pjesë edhe emisarët Steve Witkoff dhe Jared Kushner, pritet të mbërrijë në Islamabad gjatë natës për të tentuar shpëtimin e marrëveshjes në momentet e fundit.
