Media libaneze raportuan për sulme izraelite në fshatra të jugut të Libani, pavarësisht armëpushimit të shpallur të enjten dhe deklaratës publike të presidentit të Shtetet e Bashkuara të Amerikës, Donald Trump, se Izraeli nuk do të bombardonte më Libanin.
Sipas gazetës së afërt me Hezbollah, “Al-Akhbar”, një dron goditi një banesë mes fshatrave Haddatha dhe al-Tiri, ndërsa televizioni “Al Mayadeen” raportoi për zjarr artilerie dhe mitralozi ndaj fshatit Kounine, përcjell Ynet.
Deputeti i Hezbollahut, Hassan Fadlallah, deklaroi se grupi ka kontaktuar drejtuesit e Iranit për t’i informuar mbi atë që ai e cilësoi si shkelje të armëpushimit nga ana e Izraelit.
Ai kritikoi gjithashtu qeverinë libaneze, duke thënë se ajo po ndjek projekte “që nuk janë në interesin kombëtar”.
Një ditë më parë, Trump kishte shkruar në rrjetin e tij se SHBA do të punonte me Libanin dhe do të trajtonte “çështjen e Hezbollahut në mënyrën e duhur”, duke shtuar se “Izraeli nuk do ta bombardojë më Libanin”.
Ndërkohë, ushtria izraelite njoftoi se forcat speciale kishin zbarkuar në një zonë malore në jug të Libanit, pranë kufirit me Sirinë, vetëm pak minuta para hyrjes në fuqi të armëpushimit. Operacioni, i koduar “Shqiponja”, ishte i pari i këtij lloji në atë zonë gjatë konfliktit aktual.
Në të njëjtën kohë, kryeministri i Libanit, Nawaf Salam, dhe presidenti Joseph Aoun zhvilluan një takim për të vlerësuar situatën dhe për të forcuar armëpushimin. Diskutimet përfshinë edhe kontaktet e Aoun me Trumpin, sekretarin amerikan të Shtetit dhe liderë të tjerë rajonalë e ndërkombëtarë.
Salam deklaroi se Libani po përgatitet për negociata dhe për zbatimin e vendimeve qeveritare, duke përfshirë forcimin e autoritetit të shtetit dhe kufizimin e armëve në kryeqytet.
Ai shprehu gjithashtu shpresën se banorët e zhvendosur nga jugu i vendit dhe periferia jugore e Bejrutit do të mund të kthehen së shpejti në shtëpitë e tyre, me mbështetjen e shtetit për rindërtimin dhe hapjen e rrugëve.
