Banka e Nju Jorkut po detyron skanimet e syrit dhe të gjurmëve të gishtave mes shqetësimeve të shtuara të sigurisë në zyrat e korporatave. JPMorgan Chase i ka thënë stafit se po zhvendoset në selinë e re shumëmiliardëshe të bankës amerikane në Manhatan dhe se duhet të ndajnë të dhënat e tyre biometrike për të hyrë në ndërtesë, duke anashkaluar një plan të mëparshëm për regjistrim vullnetar.
Punonjësit që kanë filluar punën në qiellgërvishtësin në 270 Park Avenue që nga gushti kanë marrë emaile ku thuhet se aksesi biometrik është “i detyrueshëm”, sipas një komunikate të parë nga Financial Times. Kjo i detyron punonjësit të skanojnë gjurmët e gishtave ose syrin e tyre në vend të kartave të identitetit për të kaluar portat e sigurisë në holl.
JPMorgan nuk pranoi të komentojë. Selia e bankës, e cila kushtoi rreth 3 miliardë dollarë, do strehojë rreth 10,000 punonjës pasi të hapet plotësisht më vonë këtë vit.
Qëllimi është që hyrja në ndërtesë të bëhet më e sigurt dhe më e përshtatshme. Ka përjashtime për disa punonjës që mund të përdorin ende kartën e tyre për të hyrë në ndërtesë, megjithëse nuk ishte e qartë se kush do t’i merrte ato.
Kjo vjen mes shqetësimeve të shtuara të sigurisë në zyrat e korporatave në Nju Jork pas të shtënave fatale në 345 Park Avenue në korrik, disa blloqe larg zyrave të JPMorgan.
Dave Komendat, shef i sigurisë në Corporate Security Advisors, tha se biometrika ishte përdorur për dekada në zona me siguri më të lartë, si godinat qeveritare dhe qendrat e të dhënave, por vendosja e tyre në ndërtesa komerciale për një numër të madh njerëzish do ishte një përdorim në një shkallë të re dhe më të madhe, shkruan FT.
“Është një mënyrë shumë efektive për t’u siguruar që njerëzit që hyjnë në ambientin tuaj janë saktësisht ata që duhet të jenë,” tha Komendat, i cili më parë ka qenë një ekzekutiv i sigurisë në Boeing.
Ndërtesa prej 60 katesh, 2.5 milionë metra katrorë, çeliku dhe xhami, ngrihet mbi fqinjët e saj, dhe shefi ekzekutiv Jamie Dimon e ka përshkruar atë si një “manifestim fizik të bukur” të kompanisë së tij. Punonjësit e kaluar dhe të pranishëm flasin për 270 Park si një “monument” për kohën e Dimon si shef.
Planet për të shembur ndërtesën e vjetër të JPMorgan, e cila ishte shumë e vogël për të strehuar radhët në rritje të stafit të saj të korporatës, u njoftuan në vitin 2018. Kryebashkiaku i Nju Jorkut, Eric Adams, e krahasoi ndërtimin e godinës me një “moment të vitit 1932” pas Depresionit të Madh dhe ndërtimit në atë kohë të Empire State Building.
JPMorgan po rinovon edhe pronat e tjera të saj në Manhatanin qendror, duke përfshirë zyrat e saj në 383 Madison Avenue, dhe po shqyrton shtimin e dhomave hoteliere për punonjësit vizitorë në ndërtesën fqinje 250 Park Avenue që e bleu vitin e kaluar.
