Aleatët e Donald Trump dhe Elon Musk i kanë kërkuar presidentit amerikan dhe mbështetësit të tij miliarder të përmirësojnë marrëdhënien e tyre, duke kërkuar të kufizojnë dëmin politik dhe tregtar nga përplasja spektakolare e kësaj jave.
Ndarja mes çiftit të fuqishëm, me sa duket për shkak të projektligjit të taksave të nënshkruar nga presidenti, kërcënon të prishë pjesë thelbësore të axhendës legjislative të Shtëpisë së Bardhë, si dhe të shkatërrojë një aleancë të fituar me vështirësi midis Silicon Valley dhe Uashingtonit.
“Është për të ardhur keq… shpresoj se do rikthehen së bashku”, tha të premten senatori i Teksasit, Ted Cruz, i cili ishte në Zyrën Ovale kur Trump kritikoi Musk-un.
“Shumë konservatorë mendojnë se kjo nuk është mirë, le të përqafohemi dhe të pajtohemi.”
Drejtori ekzekutiv i Tesla-s, i cili e kishte kaluar të enjten duke lëshuar sulme gjithnjë e më shpërthyese ndaj Trump, dukej se ishte i hapur për një ulje të tensioneve, duke iu përgjigjur pozitivisht menaxherit të fondeve mbrojtëse Bill Ackman, i cili i kërkoi dyshes të “bënin paqe për të mirën e vendit tonë të madh”.
Vetë Trump pretendoi se “as nuk po mendonte për Elon-in”, përpara se të shtonte në CNN: “Ky i shkretë ka një problem… Nuk do të flas me të për një kohë mendoj, por i uroj gjithë të mirat.”
Presidenti e kaloi mëngjesin duke lavdëruar rezultatet e administratës së tij në ekonomi pas shifrave të dobëta të vendeve të punës dhe duke i kërkuar Rezervës Federale të ulë normat e interesit.
Figurat e teknologjisë që mbështetën administratën duke shpresuar se ajo do sillte një epokë uljesh taksash dhe derregullimi, kanë nxituar për të përmbajtur grindjen, me sukses të kufizuar.
“Elon nuk po pranon telefonata nga askush,” tha për Financial Times një financues i Silicon Valley dhe donator i madh i kandidatëve republikanë.
“Jo nga njerëz që kanë investuar miliarda në kompanitë e tij… Silicon Valley po humbet toruan.”
Përpjekjet për ta bindur Trump-in të pajtohej me ish-“shokun e tij të parë” u penguan të premten në mëngjes nga lajmi se presidenti planifikonte të shiste ose të dhuronte Tesla-n që kishte blerë në mars si një shenjë mbështetjeje për Musk-un. Raportet për një telefonatë pajtuese midis dy burrave u hodhën poshtë gjithashtu nga Shtëpia e Bardhë.
Miliarderi Tim Draper, i cili investoi në Tesla dhe SpaceX, i kërkoi Trump-it dhe Musk-ut të ribashkoheshin për të shpëtuar të ashtuquajturin Departament të Efikasitetit të Qeverisë, një nismë që u mbështet nga shumë njerëz në botën e teknologjisë dhe e përbërë nga drejtues të Silicon Valley.
«Duket se po bënin përparim të mirë së bashku», tha Draper për Financial Times.
