Anija e mallrave Rubymar, e sulmuar muajin e kaluar, është mbytur në Detin e Kuq jugor, tha në një deklaratë të shtunën qeveria e njohur ndërkombëtarisht e Jemenit.
Nëse verifikohet, do të ishte anija e parë e humbur që kur militantët Houthi filluan të synonin anijet tregtare në nëntor.
Deklarata e qeverisë tha se anija u mbyt të premten mbrëma dhe paralajmëroi për një “katastrofë mjedisore”.
Anija mbante më shumë se 41,000 ton pleh kur u sulmua, tha më parë Komanda Qendrore e Ushtrisë Amerikane, përcjell Reuters.
Militantët Houthi të Jemenit kanë sulmuar anijet tregtare në rajonin e Detit të Kuq që nga mesi i nëntorit, duke thënë se ata po veprojnë në solidaritet me palestinezët në Gaza.
Të hënën, një ekip i qeverisë jemenase vizitoi Rubymar, një anije mallrash me flamur Belize, në pronësi të Mbretërisë së Bashkuar, dhe tha se ishte pjesërisht e zhytur në ujë dhe mund të fundosej brenda disa ditësh.
Ushtria amerikane më parë tha se sulmi kishte dëmtuar ndjeshëm anijen e mallrave dhe kishte shkaktuar një njollë nafte prej 18 miljesh (29 km).
Flota e Pestë e Marinës së Shteteve të Bashkuara nuk iu përgjigj menjëherë një kërkese për të konfirmuar fundosjen të shtunën.
