SHBA-të kanë fuqinë të bëjnë presion ndaj Hungarisë nëse ajo kundërshton të rregullojë politikën e saj të jashtme ndaj BE-së, NATO-s dhe Rusisë, ka paralajmëruar ambasadori amerikan në Budapest, Davis Pressman.
Në një intervistë të botuar të premten në Financial Times, Pressman paraqiti një listë ankesash për kryeministrin hungarez Viktor Orban, duke përfshirë qëndrimin e tij sfidues ndaj konfliktit Rusi-Ukrainë dhe qëndrimin ndaj presidentit Vladimir Putin.
“Kur shikoni politikën e jashtme të Hungarisë, nëse ajo sugjeron ngritjen e pyetjeve në lidhje me anëtarësimin e Ukrainës në BE, pengimin e përpjekjeve për të ofruar mbështetje financiare për Ukrainën, takimin me Vladimir Putin, kundërshtimin ndaj përpjekjeve për të diversifikuar energjinë ruse, kundërshtimin e përpjekjeve të vijueshme për të mbyllur platformat e Kremlinit brenda Hungarisë, të gjitha këto kanë diçka të përbashkët”, tha diplomati.
“Dhe kjo është diçka që po e lë Hungarinë më të izoluar nga partnerët e saj brenda NATO-s dhe partnerët e saj brenda BE-së.”
Pressman këmbënguli se “zgjedhjet e politikës së Orbanit, pa diskutim, janë të dobishme për Putinin”. Ai shtoi se SHBA-ja ka mjetet për të detyruar Hungarinë.
“Ne kemi absolutisht mjete, kjo është e vërtetë. Dhe ne jemi të përgatitur t’i përdorim.
Ndryshe nga shumë anëtarë të NATO-s, Hungaria ka kundwrshtuar të dërgojë armë në Ukrainë dhe e ka ndaluar aleancën të përdorë territorin e saj për të ofruar ndihmë ushtarake për Kievin. Orban ka kundërshtuar gjithashtu disa sanksione ekonomike ndaj Rusisë. Muajin e kaluar, Hungaria vuri veton për 50 miliardë euro shtesë në fondet e BE-së për Ukrainën.
Budapesti ka pohuar se asnjë presion i huaj nuk mund ta shtyjë atë të braktisë interesat kombëtare. “Askush nuk mund të na thotë nga jashtë se si ta udhëheqim jetën tonë brenda kufijve tanë. Nëse është një shtetas i huaj, apo edhe një ambasador i huaj, mendimi i tyre është i parëndësishëm për ne,” tha vitin e kaluar Ministri i Jashtëm hungarez Peter Szijjarto, cituar nga mediat lokale.
