Shteti Islamik mori përgjegjësinë të enjten për dy shpërthimet në Iran që vranë rreth 100 njerëz dhe plagosën shumë të tjerë në një memorial për komandantin e lartë Qassem Soleimani, të vrarë nga një sulm amerikan me dron vite më parë.
Në një deklaratë të postuar në kanalet e saj Telegram, grupi militant tha se dy anëtarë të IS-it kishin shpërthyer brezat me eksploziz në turmën që ishte mbledhur në varrezat në qytetin juglindor iranian Kerman të mërkurën.
Memoriali shënonte përvjetorin e katërt të vdekjes së Soleimani, i cili u vra në Irak në vitin 2020 nga një dron amerikan.
Në Uashington, zëdhënësi i Shtëpisë së Bardhë John Kirby u tha gazetarëve se Shtetet e Bashkuara nuk ishin në gjendje të dyshonin në pretendimin e Shtetit Islamik se ishte përgjegjës për sulmin e së mërkurës.
Teherani është zotuar të hakmerret për sulmin më të përgjakshëm që nga Revolucioni Islamik i vitit 1979. Shpërthimet e dyfishta plagosën gjithashtu 284 persona, përfshirë fëmijë.
“Aata do përballen me një hakmarrje shumë të fortë nga duart e ushtarëve të Soleimanit,” u tha gazetarëve në Kerman nënpresidenti i parë i Iranit, Mohammad Mokhber.
Autoritetet iraniane kanë bërë thirrje për protesta masive të premten, kur do mbahen funeralet e viktimave të dy shpërthimeve, njoftuan mediat shtetërore.
Korpusi i fuqishëm i Gardës Revolucionare të Iranit i përshkroi sulmet si një akt burracak “që synon të krijojë pasiguri dhe përçarje “.
Presidenti iranian Ebrahim Raisi ka dënuar atë që ai e quajti “krim i urryer dhe çnjerëzor” i së mërkurës. Autoriteti më i lartë i Iranit, Udhëheqësi Suprem Ayatollah Khamenei, u zotua të hakmerret për bombardimet.
Këshilli i Sigurimit i Kombeve të Bashkuara në një deklaratë dënoi atë që e quajti “sulm terrorist burracak” i së mërkurës dhe u dërgoi ngushëllimet e tij familjeve të viktimave dhe qeverisë iraniane.
