BE-ja do duhet të reformojë në mënyrë thelbësore rregullat e saj përpara se Ukraina të mund të anëtarësohet, u tha gazetarëve presidenti francez Emmanuel Macron.
Macron mbështet pranimin e Kievit në bllok, por paralajmëroi se Ukraina nuk duhet të lejohet të zvogëlojë industrinë e BE-së.
Këshilli Evropian ra dakord të enjten për të hapur negociatat e pranimit me Ukrainën dhe Moldavinë, pasi kryeministri hungarez Viktor Orban – i cili kundërshton anëtarësimin e Ukrainës – abstenoi nga votimi për vendimin.
Presidenti i Këshillit Charles Michel e përshëndeti vendimin si “një sinjal politik shumë të fuqishëm”, por Orban dhe skeptikë të tjerë si kryeministri sllovak Robert Fico kanë argumentuar se masa ka pak rëndësi praktike.
Macron u bëri jehonë deklaratave të tyre të premten, duke u thënë gazetarëve se Ukraina është ende “shumë larg” anëtarësimit në bllok.
Gjatë një konference për shtyp, Macron u pyet nëse pranimi i Ukrainës do kërcënonte jetesën e fermerëve francezë, të cilët do dëmtoheshin nga prodhimet më të lira nga homologët e tyre ukrainas.
“Ne jemi shumë larg nga zgjerimi efektiv me Ukrainën dhe, në çdo rast, zgjerimi, çfarëdo qoftë ai, do kërkojë një reformë të thellë të rregullave tona,” tha ai.
“Unë jam i përkushtuar ndaj sovranitetit të Evropës në aspektin e bujqësisë,” vijoi Macron.
“Ne do vijojmë ta mbrojmë atë dhe të ruajmë kapacitetin tonë të prodhimit,” shtoi ai.
