Numri i të vdekurve nga sulmet e vazhdueshme izraelite në luftën në Gaza ka tejkaluar 10,000 njerëz, tha të hënën Ministria palestineze e Shëndetësisë në enklavën e bllokuar.
Ashraf al-Qudra, zëdhënës i Ministrisë së Shëndetësisë, tha në një konferencë për shtyp se ushtria izraelite vrau 10,022 njerëz dhe plagosi më shumë se 25,000 të tjerë.
Numri i të vdekurve përfshin 4,104 fëmijë dhe 2,641 gra, shtoi ai.
Al-Qudra tha gjithashtu se Ministria e Shëndetësisë ka marrë raporte për 2,350 njerëz të zhdukur nën rrënoja, duke përfshirë rreth 1,300 fëmijë, sipas AA.
Në orët e fundit, tha ai, avionët luftarakë izraelitë shënjestruan tre spitale ngjitur në qytetin e Gazës, duke përfshirë një spital të syve, një spital psikiatrik dhe Spitalin e Fëmijëve Al-Rantisi.
Sipas zëdhënësit, sulmi izraelit i tre spitaleve la tetë palestinezë të vrarë dhe 125 të tjerë të plagosur.
Izraeli ka nisur sulme ajrore dhe tokësore në Rripin e Gazës pas një sulmi ndërkufitar nga Hamasi më 7 tetor.
Përveç numrit të madh të viktimave dhe zhvendosjeve masive, furnizimet bazë po mbarojnë për 2.3 milionë banorët e Gazës për shkak të rrethimit izraelit.
