Protestuesit pro-palestinezë lyen me bojë të kuqe gardhin e sigurisë së Shtëpisë së Bardhë në Uashington, DC të shtunën në mbrëmje, me disa që provuan të kalojnë portën, ndërsa denoncuan presidentin Joe Biden për mbështetjen e Izraelit.
Aktivistët valëvitnin flamuj palestinezë dhe bërtisnin parrulla drejtuar presidentit. Ata gjithashtu tundën me dhunë portën ndërsa personeli i sigurisë shikonte nga ana tjetër.
Pavarësisht atmosferës së nxehtë, zëdhënësi i Shërbimit Sekret Anthony Guglielmi u tha më vonë gazetarëve se “përpjekja për të hyrë në portë u trajtua pa incidente” dhe nuk pati arrestime jashtë Shtëpisë së Bardhë.
Dhjetëra mijëra marshuan në Uashington, DC të shtunën, duke bërë thirrje për një armëpushim midis Izraelit dhe militantëve palestinezë, duke dënuar “gjenocidin” në Gaza.
Demonstratat në mbështetje të Palestinës ose Izraelit janë zhvilluar në shumë vende që nga fillimi i luftimeve në Lindjen e Mesme në fillim të tetorit.
Të premten, Policia e Kapitolit të SHBA arrestoi 52 mbështetës të Palestinës për protesta në zyrat e disa senatorëve. Gati 300 njerëz u arrestuan muajin e kaluar për pjesëmarrje në një protestë të ngjashme brenda rotondës së ndërtesës së zyrës Cannon në DC.
Luftimet shpërthyen pasi Hamasi dhe grupet militante palestineze aleate sulmuan Izraelin, duke vrarë rreth 1400 njerëz, kryesisht civilë dhe duke marrë peng më shumë se 200.
Izraeli u përgjigj me sulme ajrore në Gaza dhe që atëherë ka nisur një operacion tokësor në enklavën palestineze.
Mbi 9 mijë palestinezë janë vrarë në Gaza, sipas autoriteteve lokale. OKB-ja dhe grupet e të drejtave të njeriut po paralajmërojnë për situatën e rëndë humanitare në enklavë të shkaktuar nga bllokada dhe bombardimet izraelite.
