Ushtria izraelite njoftoi të martën se 123 ushtarë janë vrarë që nga luftimet që shpërthyen me grupin palestinez Hamas gjatë fundjavës.
Faqja e internetit Times of Israel raportoi se ushtria izraelite publikoi emrat e 38 ushtarëve të tjerë të vrarë në luftimet gjatë tre ditëve të fundit, duke e çuar numrin e përgjithshëm në 123.
Ndërkohë, numri i përgjithshëm i izraelitëve të vrarë deri më tani shkon në mbi 1 mijë, ndërsa numri i të plagosurve është 2616.
Sa i përket robërve izraelitë që mbahen në Gaza, asnjë numër i saktë nuk është bërë i ditur nga autoritetet izraelite. Ndërsa ushtria izraelite njoftoi se informoi mbi 100 familje se të afërmit e tyre janë në robëri të Hamasit, ambasadori i Izraelit në OKB Gilad Erdan vlerësoi se numri i pengjeve izraelite është midis 100 dhe 150.
Hamasi nisi Operacionin ‘Al-Aksa Flood’ kundër Izraelit herët të shtunën, duke lëshuar një breshëri raketash dhe duke u infiltruar në Izrael nga toka, ajri dhe deti. Grupi tha se sulmi i befasishëm ishte në përgjigje të sulmit ndaj Xhamisë Al-Aksa në Jerusalemin Lindor të pushtuar dhe rritjes së dhunës së kolonëve kundër palestinezëve.
Si hakmarrje, ushtria izraelite nisi operacionin ‘Shpatat e Hekurt’ kundër Hamasit në Rripin e Gazës.
Numri i palestinezëve të vdekur nga sulmet izraelite në Gaza është rritur në 830, përfshirë 143 fëmijë dhe 105 gra, tha Ministria e Shëndetësisë me bazë në Gaza të martën herët. Ajo tha se numri i të plagosurve është rritur në rreth 4,000.
