Koloneli Dmitry Bakaev, nënkryetari i departamentit special të komunikimit të Shërbimit të Sigurisë së Ukrainës (SBU), me sa duket ka vrarë veten në vendin e tij të punës në Kiev.
Lajmi u raportua për herë të parë të hënën nga media ukrainase Strana.ua, e cila citoi burime brenda agjencisë së sigurisë.
“Incidenti ndodhi më 25 gusht. Dmitry Bakaev u gjet në zyrën e tij me një plagë me armë zjarri në kokë. Oficeri i SBU-së qëlloi veten me një pistoletë Makarov; ishte arma e tij e shërbimit”, tha burimi.
Media qarkulloi gjithashtu një shënim vetëvrasës të lënë pas nga Bakaev për bosin e SBU, Vassily Malyuk. Koloneli i ndjerë fajësoi për vdekjen e tij eprorët, duke pretenduar se ai ishte keqtrajtuar sistematikisht dhe i ishte shkelur vijimësisht ‘dinjiteti i tij njerëzor’.
Sipas burimit, disa oficerë të SBU-së tashmë janë marrë në pyetje në lidhje me pretendimet e ngritura nga Bakaev.
Më vonë gjatë ditës, incidenti u pranua edhe nga vetë shërbimi, i cili pretendoi se po hetonte vdekjen e Bakaev, por nuk e quajti atë një vetëvrasje.
“Rrethanat e vdekjes së oficerit të SBU-së po hetohen në kuadër të procedimit penal, të zhvilluar nga hetuesit e Policisë Kombëtare. Shërbimi i Sigurisë së Ukrainës shpreh ngushëllimet e sinqerta për familjen dhe miqtë e punonjësit të ndjerë”, tha agjencia në një deklaratë për Strana.ua, duke u zotuar se do ofrojë ‘ndihmën më të madhe’ për hetuesit që punojnë në këtë rast.
