Gjiganti kinez i pasurive të paluajtshme ‘China Evergrande Group’ postoi një humbje të kombinuar prej 81 miliardë dollarësh gjatë dy viteve, zbulon raporti i rezultateve i publikuar të hënën.
Kompania dështoi në fund të vitit 2021 dhe ka qenë duke luftuar për të përmbyllur projektet dhe për të shlyer furnitorët dhe huadhënësit. Në mars, Evergrande njoftoi një nga programet më të mëdha të ristrukturimit të borxhit të vendit dhe tani po mbledh mbështetje për të përfunduar procesin.
Humbjet neto të Evergrande për 2021 dhe 2022 arritën në 476 miliardë juanë (66.36 miliardë dollarë) dhe 105.9 miliardë juanë, përkatësisht, si rezultat i fshirjes së pronave, kthimit të tokave, humbjeve në aktivet financiare dhe kostove të financimit, tha kompania.
Ekspertët e tregut nuk ishin optimistë për perspektivat e Evergrande.
“Rezultatet janë të pakuptimta nëse modeli i biznesit prishet,” tha Charles Macgregor, kreu i Lucror Analytics për Azinë.
Rezultatet nxjerrin në pah shkallën e problemeve me të cilat është përballur ndërtuesi kryesor i pronave të vendit në mes të një krize strehimi që ka tronditur ekonominë kineze gjatë dy viteve të fundit.
Kriza e borxhit të Evergrande është përhapur në sektorin e pronave të Kinës, duke shkaktuar një varg dështimesh me projektet e pronave të braktisura që shihen në të gjithë vendin.
