Kancelari Olaf Scholz përballet me një akt të brishtë ekuilibrues këtë javë në konsultimet e qeverive gjermano-kineze në Berlin, duke kërkuar të mbajë lidhje të mira me partnerin më të madh tregtar të Gjermanisë, duke respektuar një premtim të G7 për të ‘zhdukur rrezikun’ nga Pekini.
Scholz pret kryeministrin kinez Li Qiang për darkë në kancelari të hënën në mbrëmje përpara raundit të shtatë të bisedimeve dypalëshe dyvjeçare, të cilat janë gjithashtu sesioni i parë ballë për ballë që nga pandemia Covid-19.
Samiti do mbahet të martën në kancelari përpara se Li dhe ministrat kinezë për tregti dhe reforma të marrin pjesë në forumin gjermano-kinez për bashkëpunimin ekonomik dhe teknologjik.
Fakti që Li zgjodhi Gjermaninë për udhëtimin e tij të parë jashtë shtetit si kryeministër pasqyron marrëdhënien e veçantë midis ekonomive më të mëdha të Evropës dhe Azisë. Zgjerimi i shpejtë kinez dhe kërkesa për makina dhe pajisje gjermane nxitën rritjen e vetë Gjermanisë gjatë dy dekadave të fundit.
Kina u bë partneri i vetëm më i madh tregtar i Gjermanisë në vitin 2016 dhe është tregu kryesor për kompanitë kryesore gjermane, duke përfshirë Volkswagen, BASF dhe BMW.
“Konsultat e qeverive kineze e gjermane janë shumë të dallueshme midis marrëdhënieve të Kinës me vendet e mëdha perëndimore,” tha Wang Yiwei, drejtor i Qendrës për Studime Evropiane në Universitetin Renmin të Kinës.
Marrëdhëniet megjithatë janë tensionuar mes shqetësimeve në Perëndim për rritjen e kontrollit të Partisë Komuniste mbi shoqërinë dhe ekonominë, konkurrencën e pandershme dhe ambiciet territoriale të Pekinit.
Scholz u bashkua me liderët e tjerë të vendeve të pasura të Grupit të Shtatëve (G7) muajin e kaluar duke u zotuar se do ‘zhdukte rrezikun’ pa ‘u shkëputur’ nga Kina.
Megjithatë, kuptimi i ‘zhdukjes së rrezikut’ mbetet për t’u përcaktuar, thonë analistët.
Qeveria e Scholz-it është e ndarë midis partnerëve më të vegjël të koalicionit, të Gjelbërve dhe Demokratëve të Lirë, dhe socialdemokratëve të tij të qendrës së majtë.
Analistët në Berlin thanë se delegacioni kinez ka të ngjarë të lobojë në qeverinë gjermane drejtpërdrejt dhe tërthorazi nëpërmjet bizneseve të mëdha për t’i bërë presion Bashkimit Evropian që të mos shkojë shumë larg për sa i përket rregullimit të biznesit në Kinë.
“Ata e dinë se kompanitë gjermane do hapin kanale të drejtpërdrejta në kancelarinë,” tha Andreë Small, një bashkëpunëtor i lartë në programin e Fondit Gjerman Marshall për Azinë.
Shmangia e përshkallëzimit politik
Mikko Huotari në Institutin Mercator për Studimet e Kinës (MERICS) në Berlin tha se bisedimet ishin një goditje e befafishme për Pekinin, duke treguar se ai kishte ende partnerë të rëndësishëm në Perëndim.
“Thënë kjo, varet nga ne, të marrim diçka prej saj dhe ne kemi interes të qëndrojmë në kontakt të ngushtë me Kinën për çështje si qëndrueshmëria dhe në përgjithësi, për marrëdhënie të qëndrueshme ekonomike,” tha ai.
“Ne gjithashtu kemi një interes që të mos lejojmë që tensionet politike të përshkallëzohen.”
Bisedimet vijnë pasi Antony Blinken u bë të dielën Sekretari i parë i Shtetit i SHBA-së që viziton Kinën në pesë vjet, duke theksuar rëndësinë e mbajtjes së linjave të hapura të komunikimit për të zvogëluar rrezikun e llogaritjes së gabuar.
Ato vijnë gjithashtu pasi Ministria e Jashtme e Gjermanisë finalizon një dokument mbi qasjen e saj ndaj Kinës, që pritet të pasqyrojë qëndrimin më të ashpër që ajo përshkroi në strategjinë e saj të parë të sigurisë kombëtare të botuar javën e kaluar.
Kina paraqet një kërcënim në rritje për sigurinë globale, duke pretenduar në mënyrë agresive supremacinë në Azi dhe duke kërkuar të përdorë fuqinë e saj ekonomike për të arritur qëllimet politike, thuhet në strategji.
Qeveria po u kërkon kompanive të diversifikohen larg Kinës, por shumë shefa ekzekutivë gjermanë kanë paralajmëruar për rreziqet e ndërprerjes ose reduktimit të lidhjeve me ekonominë e dytë më të madhe në botë, ndërkohë që Gjermania është në recesion.
Delegacioni kinez do takohet me disa nga ata shefa ekzekutivë të hënën, sipas njerëzve të njohur me planet.
Të martën, pas këshillimeve të qeverisë, delegacioni do shkojë në Mynih për të takuar zyrtarë rajonalë dhe drejtues të korporatave që pasqyrojnë nivelin e biznesit kinez me shtetin jugor gjerman të Bavarisë.
Delegacioni kinez do shkojë në Paris për një vizitë zyrtare e për të marrë pjesë në një konferencë financiare në datat 22-23 qershor.
VINI RE: Ky material është pronësi intelektuale e Reuters
Përgatiti për Hashtag.al, K.Manjani
