Britania ka tani normën më të lartë të inflacionit të çmimeve të konsumit në Evropën Perëndimore, pasi ajo ra me më pak se sa pritej në mars në 10.1% nga 10.4% e shkurtit, treguan të dhënat zyrtare të mërkurën.
Ekonomistët e anketuar nga Reuters kishin parashikuar se norma vjetore do zbriste në 9.8% në mars, duke u larguar më tej nga niveli më i lartë 41-vjeçar i tetorit prej 11.1%. Pavarësisht rënies në mars, norma e inflacionit të Britanisë ishte më e larta në Evropën Perëndimore dhe i vetmi vend në rajon që postoi një numër dyshifror për muajin e kaluar, pasi Austria regjistroi një normë më të lartë inflacioni në shkurt.
Të dhënat ka të ngjarë të forcojnë bastet se Banka e Anglisë do rrisë përsëri normat e interesit muajin e ardhshëm pasi inflacioni bazë – i cili heq çmimet e paqëndrueshme të energjisë dhe ushqimeve – nuk ra siç pritej në mars dhe në vend të kësaj u mbajt në 6.2%.
“Këto shifra riafirmojnë saktësisht pse ne duhet të vazhdojmë me përpjekjet tona për të ulur inflacionin në mënyrë që të mund të lehtësojmë presionin mbi familjet dhe bizneset,” tha ministri i Financave Jeremy Hunt.
Zyra për Statistikat Kombëtare tha se çmimi i ushqimeve dhe pijeve joalkoolike u rrit me 19.1% në terma vjetorë në mars – rritja më e madhe e tillë që nga gushti 1977.
Muajin e kaluar Banka e Anglisë (BoE) tha se priste që inflacioni ‘të bjerë ndjeshëm’ në tremujorin e dytë.
“Një rritje tjetër e normës prej 25 pikë bazë duket shumë e mundshme në maj dhe Banka duhet të jetë e gatshme për të ndërmarrë veprime të mëtejshme nëse të dhënat ekonomike nuk tregojnë shenja më përfundimtare të ftohjes,” tha Hugh Gimber, strateg i tregut global në J.P. Morgan Asset Management.
Ndërsa inflacioni ka të ngjarë të bjerë natyrshëm pasi rritjet e mprehta të çmimeve të energjisë që u panë vitin e kaluar janë jashtë krahasimit vjetor, BoE po përpiqet të gjykojë se sa shpejt do bjerë ai.
Treguesit e tjerë janë dukur të përzier në këtë front, me të dhënat e së martës që tregojnë rritje më të fortë të pagave se sa pritej. Anketat e biznesit megjithatë tregojnë koston e ftohjes dhe presionin e çmimit të shitjes.
Tregjet financiare të martën treguan një mundësi prej 95% që BoE të rrisë normat e interesit muajin e ardhshëm, nga 85% të martën.