Disa fonde pensionesh në SHBA dhe të paktën dy jashtë vendit kanë humbur miliona dollarë për shkak të investimeve në aksionet e Silicon Valley Bank (SVB), raportoi Newsweek të martën. Rënia e bankës në fjalë ka bërë që aksionet bankare globale të bien.
Institucione të tilla si Fondi i Pensionit të Punonjësve Publikë të Kalifornisë (CalPERS), Sistemi Shtetëror i Pensionit të Mësuesve të Kalifornisë (Cal STRS), Shërbimi Kombëtar i Pensioneve të Koresë (NPS) dhe fondi i pensioneve Alecta i Suedisë thuhet se kishin investuar në bankën e përqendruar në teknologji dhe start-up.
CalPERS, e cila menaxhon fondin më të madh publik të pensioneve në SHBA me mbi 1.5 milionë anëtarë, kishte rreth 67 milionë dollarë të investuara në SVB dhe rreth 11 milionë dollarë në Signature Bank, e cila gjithashtu u mbyll gjatë fundjavës.
Alecta, fondi më i madh i pensioneve në Suedi, që mbikëqyr rreth 104 miliardë dollarë aktive, kishte rreth 848.7 milionë dollarë të investuara në SVB dhe rreth 282.9 milionë dollarë në firmë në kohën e dështimit.
SVB, dikur huadhënësi i 16-të më i madh në SHBA, u mbyll nga rregullatorët të premten e kaluar pasi depozituesit nxituan të tërhiqnin paratë e tyre mes shqetësimeve për shëndetin financiar të bankës. Është përshkruar si dështimi më i madh i një banke amerikane që nga kriza financiare në 2008.
Shpërthimi i huadhënësit më të madh nga depozitat në Silicon Valley vjen në mes të politikave agresive të ndjekura nga Rezerva Federale e SHBA. Rregullatori ka rritur disa herë normën bazë të interesit gjatë muajve të fundit, duke rritur rrezikun e zhvlerësimit të aktiveve në bilancet e shumë institucioneve financiare.
Të hënën, presidenti amerikan Joe Biden këmbënguli se sistemi bankar amerikan mbetet i sigurt dhe se qeveria do bënte ‘çfarëdo që të nevojitet’ për ta mbrojtur atë nga një krizë e plotë.
