Presidenti serb Aleksandar Vuçiç tha të premten vonë se vendi i tij po kalon procesin e anëtarësimit dhe integrimit në BE, por nuk dëshiron të anëtarësohet në NATO.
Deklaratat e Vuçiçit erdhën në ditën e dytë të seancës speciale të Kuvendit të Serbisë, ku u diskutua në mënyrë gjithëpërfshirëse plani franko-gjerman, i mbështetur nga SHBA e BE, për zgjidhjen e çështjes së Kosovës.
“Serbia nuk dëshiron të anëtarësohet në NATO. Serbia dëshiron të ruajë dhe forcojë asnjanësinë e saj ushtarake. Ekziston një dallim i madh midis integrimit evropian dhe integrimit Atlantik.” – tha Vuçiç.
Ai tha se Serbia do e pengojë Kosovën të anëtarësohet në OKB dhe mund ta arrijë këtë.
Ligjvënësit miratuan raportin e qeverisë për negociatat me Kosovën nga shtatori 2022 deri në mes të janarit 2023.
Deputetët debatuan për dy ditë në një seancë të jashtëzakonshme parlamentare për Kosovën, me raportin e qeverisë për negociatat me Prishtinën në rend dite.
Raporti prej 40 faqesh nuk përmend propozimin franko-gjerman për zgjidhjen e çështjes së Kosovës, por renditi aktivitetet e kaluara dhe vlerëson progresin në çështjet dhe marrëveshjet individuale.
