Ministria e Jashtme e Indisë ka kritikuar BBC-në për transmetimin e një ‘propagande’ ndaj kryeministrit Narendra Modi.
Dokumentari përqendrohet në akuzat se qeveria e Modit diskriminon myslimanët dhe pretendon se kryeministri mund të ketë luajtur një rol në nxitjen e trazirave etnike në 2002.
“Më lejoni ta bëj shumë të qartë se ne mendojmë se kjo është një pjesë propagandistike e krijuar për të nxitur një narrativë të veçantë të diskredituar.” – tha zëdhënësi i Ministrisë së Jashtme Arindam Bagchi për NDTV të enjten.
“Paragjykimi, mungesa e objektivitetit dhe çiltërsisht, një mendim i vijueshëm kolonial, është haptazi i dukshëm.”
“Nëse ka ndonjë gjë, ky film apo dokumentar është një pasqyrim mbi agjencinë dhe individët që po tregtojnë sërish këtë narrative.” – vijoi Bagchi.
Episodi i parë i BBC-së me dy pjesë ‘India: The Modi Question’ u transmetua të martën. Duke përshkruar ngritjen e kryeministrit hindu në pushtet me fokus në politikat e tij ndaj pakicës myslimane të Indisë, seria u hap me një vështrim prapa në akuzat se Modi nuk arriti të parandalonte masakrën e qindra myslimanëve në 2002.
Modi ishte kryeministër i shtetit të Gujaratit kur një tren që transportonte pelegrinët hindu u sulmua nga një turmë myslimane para se të merrte flakë, duke vrarë 59 persona.
Pasoi një valë hakmarrjeje, me hindutë që plaçkitën xhamitë dhe vranë myslimanët. Pas disa javësh trazirash, 1,044 njerëz vdiqën, rreth tre të katërtat e tyre myslimanë.
Ndërsa Modi u akuzua për lejimin e shpërthimit të dhunës, ai u lirua në vitin 2012 nga çdo përfshirje pas një hetimi nga Gjykata Supreme e Indisë.
Gjykata hodhi poshtë një apel kundër shfajësimit të Modit vitin e kaluar, duke vendosur se çështja ishte ‘e pabazë’ dhe ishte paraqitur nga familja e një politikani të ndjerë të opozitës.
