Ndeshja e derbit Australian në A-League mes Melbourne City e Melbourne Victory u braktis të shtunën pasi tifozët pushtuan fushën dhe sulmuan portierin e City-t, Tom Glover.
Glover, 24 vjeç, u sulmua në minutën e 22-të pasi tifozët hynë në fushë nga pas portës së tij. Ai u godit me një kovë metalike në kokë, duke u përgjakur.
Lojtari ka të ngjarë të ketë pësuar tronditje gjatë sulmit, tha klubi i tij në një deklaratë.
Gjyqtari Alex King u plagos gjithashtu në përleshje, me Ligat Profesionale Australiane (APL) duke shtuar në deklaratën e tyre se ai ‘e gjeti veten të përfshirë nga sulmi i tifozëve’ gjatë skenave të dhunshme.
Megjithatë, APL nuk dha hollësi për shkallën e lëndimeve të King.
Loja fillimisht u pezullua përpara se të braktisej fare për shkak të shqetësimeve të vazhdueshme për sigurinë e lojtarëve nëse do rifillonte. Ish-ylli i Mançester Junajtid, Nani, ishte mes lojtarëve që zbritën në tunel mes kaosit.
Mbështetësit e dy klubeve kishin planifikuar një protestë në minutën e 20-të duke dalë nga stadiumi në shenjë proteste ndaj planeve të APL-së për t’i dhënë të drejtat për ndeshjen e ardhshme të Ligës A te Sydney për tre vitet e ardhshme.
Por protesta mori një kthesë menjëherë pasi u hodhën flakadanë dhe tifozët hynë në fushë. Raportet treguan se dhuna filloi pasi Glover hodhi një flakadan që kishte rënë pranë tij përsëri drejt mbështetësve ndërsa City po drejtonte ndeshjen 1-0.
