Kryeministri i Mbretërisë së Bashkuar Rishi Sunak u zotua sot se nuk do të lejojë më emigracionin e paligjshëm në vendin e tij. “Mjaft është mjaft”- është shprehur ai.
Në parlamentin britanik, Rishi Sunak tha se publiku kishte ‘të drejtë të zemërohej‘ dhe se duhet të ndalohen varkat.
Sunak paralajmëroi se “nëse nuk veprojmë tani dhe me vendosmëri, kjo vetëm do të përkeqësohet”.
Por siç citon Daily Mail, Sunak tha se ai dëshiron të trajtojë problemin që në rrënjë të tij, duke rritur pragun për njerëzit që mbulohen nga rregullat e “skllavërisë moderne”. Do të ketë një propozim që shqiptarët të mund të kthehen në vendin e tyre ‘të sigurt’, pasi 55 për qind po lejohen të qëndrojnë për momentin.
Kryeministri deklaroi se kushdo që vjen ilegalisht në Britaninë e Madhe do të ndalohet të vendoset atje. Parlamentit do t’i kërkohet të vendosë kuota se sa mund të pranohen për qëllime humanitare.
“Është e padrejtë që njerëzit vijnë këtu ilegalisht. Është e padrejtë për ata që kanë një rast të vërtetë për azil kur kapaciteti ynë për të ndihmuar përfitohet nga njerëz që vijnë nga vende që janë krejtësisht të sigurta.”-tha ai.
Sunak theksoi se legjislacioni vitin e ardhshëm do ta bëjë të qartë “se nëse hyni ilegalisht në Mbretërinë e Bashkuar, nuk duhet të jeni në gjendje të qëndroni këtu”.
Qeveria britanike është nën presion për të trajtuar udhëtimet e rrezikshme të paautorizuara nëpër Kanal. Shqiptarët përbëjnë më shumë se një të tretën e 33,000 emigrantëve që kaluan Kanalin në nëntë muajt e parë të vitit.
Sunak tha se ka arritur një marrëveshje të re me Shqipërinë që do të përfshijë stafin e forcave kufitare që do të vendosen në Tiranë.
Marrëveshja e re me Shqipërinë përcakton kthimin e azilkërkuesve në vendin “e sigurt”.
Pikat kyçe të Planit të Britanisë për ndalimin e emigrantëve shqiptarë:
- Një komandë operacionale e re, e unifikuar, me varka të vogla për të parandaluar fluksin e emigrantëve që kalojnë përmes Kanalit.
- Burime shtesë do të krijohen për të rritur numrin e bastisjeve të kryera nga oficerët e imigracionit.
- Vende të reja, duke përfshirë parqet e pushimeve të papërdorura, ish-sallat e studentëve dhe objektet ushtarake të tepërta, do të përdoren për të strehuar azilkërkuesit – me 10,000 hapësira të identifikuara që kushtojnë gjysmën e asaj që po shpenzohet tani.
- Numri i punonjësve të çështjeve të azilit do të dyfishohet dhe sistemi do të ri-inxhinierohet për të shkurtuar sasinë e kohës që duhet për të përpunuar kërkesat – me një premtim për të hequr ngarkesën e mbetur deri në fund të vitit të ardhshëm.
- Një marrëveshje e re me Shqipërinë, duke përfshirë oficerë të Forcave Kufitare në Aeroportin e Tiranës, udhëzim i ri që thotë se Shqipëria është një vend i sigurt, një rritje e pragut që dikush duhet të plotësojë për t’u kualifikuar si viktimë e skllavërisë moderne, një garanci nga Shqipëria se do të mbrojnë njerëzit e vërtetë në rrezik dhe do të ngrihet një njësi e re e dedikuar për përpunimin e shqiptarëve – me më shumë se 400 specialistë.
