Ylli i Hollivudit, Alec Baldwin, ka akuzuar disa anëtarë të ekuipazhit në xhirimet e filmit ‘Rust’ për pakujdesi, gjë që çoi në vdekjen e Halyna Hutchins. Ai ngriti një padi në Gjykatën e Lartë të Los Anxhelosit të premten duke shpresuar që të ‘pastronte emrin e tij’.
Ngjarja tragjike ndodhi një vit më parë gjatë prodhimit të filmit në një fermë në New Mexico. Baldwin gjuajti një fishek të vërtetë nga një revolver, duke qëlluar për vdekje kinematografen Halyna Hutchins dhe duke plagosur regjisorin Joel Souza.
Aktori pretendoi se ishte siguruar se ishte një armë ‘e ftohtë’, që do të thotë se ishte ose bosh ose e mbushur me fishekë manovër. Askush nuk është akuzuar për krim deri më tani.
Padia e Baldwin emërton armatoren e filmit, Hannah Gutierrez-Reed, e cila ishte përgjegjëse për trajtimin e armëve dhe municioneve në shesh, dhe asistentin e parë të regjisorit Dave Halls, i cili i dha atij armën atë ditë dhe tha se ishte e sigurt. Dy të bashkëpandehurit e tjerë janë Sarah Zachry, e cila ishte përgjegjëse për rekuizitat, dhe Seth Kenney, pronar i një firme që furnizonte me armë dhe municion grupin.
Avokati i Baldwin, Luke Nikas, pretendon se ‘tragjedia ndodhi sepse plumbat e vërtetë u futën në armë’.
Sipas padisë, aktori ‘duhet të jetojë me pikëllimin e jashtëzakonshëm dhe pasojat emocionale, fizike dhe financiare, të shkaktuara nga fakti se sjellja e pakujdesshme, garancitë dhe mbikëqyrja e të pandehurve i vendosën një armë të mbushur në dorë dhe e bëri atë, Hutchins dhe të gjithë të tjerët në grup të besonin se përdorimi i armës ishte i sigurt’.
