Gati gjysma e australianëve të pyetur në një sondazh të fundit thanë se do mbështesnin dërgimin e forcave ushtarake për të ‘mbrojtur Tajvanin’ në rast të një sulmi kinez, sipas The Guardian, i cili mori rezultatet e sondazhit përpara publikimit.
Nga 1068 australianë të pyetur, 46% thanë se ishin dakord ose ishin plotësisht dakord që vendi i tyre duhet të dërgonte trupa ‘për të ndihmuar Shtetet e Bashkuara të mbrojnë Tajvanin’, raportoi gazeta të hënën, duke cituar një sondazh ende të pabotuar të kryer nga Qendra për Studimet në Universitetin e Sidneit. Rezultatet e plota pritet të publikohen të mërkurën.
Rreth një e katërta e të anketuarve thanë se nuk pajtoheshin me idenë, 9% e të cilëve thanë se e kundërshtonin ‘fuqishëm’ndërhyrjen ushtarake. Sondazhi tregon një mbështetje më entuziaste për një politikë të tillë midis australianëve sesa midis qytetarëve amerikanë ose japonezë.
Në Japoni, 35% e të anketuarve thanë se do miratonin dërgimin e ushtrisë japoneze në mbrojtje të Tajvanit, ndërsa vetëm 33% e amerikanëve thanë se do mbështesnin një ndërhyrje të SHBA. Përqindje të ngjashme në të dy vendet thanë se nuk do të ishin dakord me një ndërhyrje, duke sugjeruar se opinioni është më i ndarë atje.
Ndërsa më shumë se gjysma e australianëve të anketuar (53%) thanë gjithashtu se do miratonin ofrimin e armëve për Taipein në rast të sulmi të ardhshëm nga Kina, një pjesë e konsiderueshme (38%) megjithatë ranë dakord që Australia nuk duhet të luajë fare rol.
Megjithëse Uashingtoni mbajti për një kohë të gjatë një politikë të ‘paqartësisë strategjike’ në lidhje me mënyrën si do i përgjigjej një sulmi nga Pekini, duke u përmbajtur nga përvijimi i ndonjë reagimi të veçantë për dekada, Presidenti Joe Biden e ka braktisur këtë qasje, duke deklaruar në mënyrë të përsëritur se SHBA do ndihmojë në mbrojtjen e Taipeit. nëse do sulmohej nga kontinenti. Pavarësisht komenteve të Biden, zyrtarë të nivelit më të ulët kanë këmbëngulur se politika e SHBA-së ndaj Tajvanit e Kinës nuk ka ndryshuar.
Tensionet midis Pekinit dhe ishullit vetëqeverisës janë rritur në muajt e fundit, pas një vizite të profilit të lartë në Taipei nga kryetarja e Dhomës së Përfaqësuesve të SHBA, Nancy Pelosi. Kina u përgjigj me një seri ushtrimesh ushtarake të papara rreth ujërave dhe hapësirës ajrore të Tajvanit, duke përfshirë një provë për një ‘bllokadë’ të plotë, duke shkaktuar dënime të zëshme nga Uashingtoni.
Tajvani, i cili zyrtarisht i referohet vetes si Republika e Kinës, ka qenë nën vetëqeverisje që nga viti 1949. Pekini e konsideron ishullin një pjesë të territorit të tij e ndërsa Republika Popullore ka deklaruar vazhdimisht qëllimin e saj për t’u ribashkuar në mënyrë paqësore me Tajvanin, ajo nuk e ka përjashtuar një zgjidhje ushtarake të çështjes.
