Burimi kryesor për ‘dosjen e diskutueshme Steele’, një dokument i mbledhur nga një ish-spiun britanik i cili pretendonte lidhje të paligjshme midis ish-presidentit të SHBA Donald Trump dhe qeverisë ruse, është liruar nga disa akuza për dëshmi të rreme.
Shtetasi rus Igor Danchenko u shpall i pafajshëm pas gati dhjetë orësh diskutimi nga juria, e cila arriti në përfundimin se analisti i politikave nuk i gënjeu agjentët federalë gjatë hetimit të tyre për fushatën e Trump në vitin 2016 dhe lidhjet e tij të dyshuara me Kremlinin.
Prokurorët pretenduan se Danchenko i dha informacione të rreme FBI-së në vitin 2017, ndërsa byroja shqyrtonte dosjen famëkeqe të përpiluar nga ish-operativi i inteligjencës në Mbretërinë e Bashkuar, Christopher Steele. Dokumenti përmbante një sërë pretendimesh për Trump-in dhe lidhjet e tij të supozuara me Moskën, por mbetet pothuajse tërësisht i pavërtetuar pavarësisht një hetimi të gjatë federal.
Çështja kundër Danchenkos u përqendrua kryesisht në marrëdhëniet e tij me Sergey Millian, një biznesmen me origjinë bjelloruse, i cili pretendonte se kishte lidhje me fushatën e Trump. Megjithëse Danchenko pranoi në FBI se i kishte kaluar informacione Steele, ai tha se Millian ishte burimi i fundit për akuzat më të rënda në dosjen Trump-Rusi, duke deklaruar se ata e diskutuan këtë çështje gjatë një sërë telefonatash dhe e-mailesh.
Megjithatë, prokurorët e akuzuan Danchenkon se gënjeu për kontaktet e tij me Millian, duke thënë se nuk kishte prova që telefonatat apo e-mailet kishin ndodhur dhe e akuzuan atë për pesë akuza në nëntor 2021.
Një nga këto akuza u hoq nga një çështje teknike javën e kaluar. Prokuroria pretendoi se Danchenko gënjeu FBI-në kur pretendoi se ai kurrë nuk ‘ka folur’ me ekzekutivin e marrëdhënieve me publikun Charles Dolan për dosjen, duke përmendur shkëmbimet me e-mail midis dy burrave.
Megjithatë, gjyqtari i Gjykatës së Qarkut, Anthony Trenga, doli në përfundimin se komunikimet elektronike nuk përbënin ‘të folur’ dhe për këtë arsye hodhi poshtë akuzën në pajtim me një mocion nga mbrojtja e Danchenkos.
Megjithëse dosja Trump-Rusi nuk mund të vërtetohej nga FBI dhe byroja dukej se kishte arsye të mira për ta konsideruar dokumentin jo të besueshëm që herët, agjentët federalë cituan punën e Steele për të marrë një urdhër për të vëzhguar ndihmësin e fushatës së Trump, Carter Page.
Agjencia është vënë nën kritika nga Trump dhe aleatët e tij, të cilët pretendojnë se ish-presidenti ishte në shënjestër të një hetimi të politizuar dhe një fushate zyrtare shpifjesh. Ndërsa ishte ende në detyrë, Trump caktoi këshilltarin special John Durham për të hetuar sjelljen e mundshme të pahijshme nga FBI gjatë hetimit të saj për kandidimin e tij presidencial në 2016.
Ishte ekipi i Durham që ngriti akuza kundër Danchenkos, përveç ish-avokatit të FBI-së Kevin Clinesmith dhe avokatit të Sigurisë Kibernetike Michael Sussmann. Clinesmith u deklarua fajtor për falsifikimin e një e-maili të lidhur me aplikacionin e mbikqyrjes për Page, por nuk u dënua me burg, ndërsa Sussman u lirua nga akuzat për deklarata të rreme në fillim të këtij viti.
