Sekretari i Përgjithshëm i Partisë së Lirisë, Tedi Blushi ka reaguar përsëri lidhur me incidentin e ndodhur në uzinën ushtarake të Gramshit, ku dy rusë dhe një ukrainas tentuan të futen në uzinë dhe sulmuan me spraj dy ushtarakët që e ruanin objektin.
Blushi thotë se blogerët e akuzuar për spiunazh kanë hyrë dhe në bazën ushtarake të Pashalimanit vetëm dy muaj më parë dhe tregon dhe fotot e publikuara nga të huajt që e tregojnë këtë.
“Këto foto janë një tjetër dëshmi e kapitullimit të institucioneve!
Janë fotot e turpit dhe të papërgjegjshmërisë ekstreme të Kryeministrit, Ministrit të Mbrojtjes, SHISH, Policisë së Shtetit, Antiterrorit dhe çdo strukture tjetër të ngarkuar me ligj për mbrojtjen e Sigurisë Kombëtare.”– shkruan Blushi.
Sipas Sekretarit të PL-së institucionet qartazi kanë dështuar dhe thotë se përpara përgjegjësisë duhet të vihet vetë Kryeministri Edi Rama, që në maj të këtij viti ia ofroi NATO-s, Bazën Ushtarake të Pashalimanit, “me garancinë e një baze detare të sigurt”.
KOMENTI I PLOTË
INSTITUCIONET KANË DËSHTUAR: “Blogerët” kanë hyrë në Pashaliman! Kryeministri ia ofroi NATO-s në maj 2022 për bazë të sigurtë!
Vetëm dy muaj më parë “blogerë” të huaj, me shtetësi dhe kombësi të panjohur zyrtarisht, kanë hyrë në bazën ushtarake të Pashalimanit.
Këto foto janë një tjetër dëshmi e kapitullimit të institucioneve!
Janë fotot e turpit dhe të papërgjegjshmërisë ekstreme të Kryeministrit, Ministrit të Mbrojtjes, SHISH, Policisë së Shtetit, Antiterrorit dhe çdo strukture tjetër të ngarkuar me ligj për mbrojtjen e Sigurisë Kombëtare.
Institucionet kanë dështuar për faqe të zezë sepse askush nuk i ka ndaluar, as i ka pyetur dhe as u ka kërkuar sqarime “blogerëve” të huaj që kanë bërë çfarë kanë dashur në Pashaliman, një nga bazat kryesore ushtarake detare të Shqipërisë, vend anëtar i NATO-s.
Kur “blogerë” apo “turistë” janë të aftë të thyejnë në çdo kohë filtrat e sigurisë të bazave tona ushtarake, të filmojnë dhe të marrin prej andej çfarë të duan, imagjinoni ç’mund të bënin armiq të NATO-s, grupet terroriste apo aktorë të tjerë që duan të dëmtojnë Sigurinë tonë Kombëtare dhe të destabilizojnë rajonin.
Skandali thellohet çdo ditë dhe vë përpara përgjegjësisë direkte vet Kryeministrin, që në maj të këtij viti ia ofroi NATO-s, Bazën Ushtarake të Pashalimanit, me garancinë e një baze detare të sigurt!
📌 www.evropaelire.org/amp/baza-detare-e-pashalimanit-vlore-shqiperi-nato/31870027.html
Shpërdorimi i detyrës duhet t’i vendosë sa më parë para ligjit të gjithë përgjegjësit! Institucionet nuk kanë funksionuar! Qartësisht kanë dështuar!
