Pronarë dhe administratorë të mjeteve lundruese dhe detare kanë zhvilluar të shtunën protestë përpara policisë Kufitare në Vlorë.
ata protestojnë kundër bllokimit të lundrimit të mjeteve pikërisht në kulmin e sezonit turistik.
Sipas tyre mjetet dhe lundrimi po bllokohen pa arsye për shkak të një aksidenti.
Ata kanë treguar se i kanë të rregullta dokumentet, “paguajmë taksa dhe sigurime shoqërore”.
Gjithashtu pronarët e mjeteve tregojnë se bllokimi i tyre në kulmin e sezonit turistik i penalizon këta të fundit pasi kanë taksa dhe fatura për të paguar dhe nuk ia dalin dot ti paguajnë.
“Jemi kredimarrës dhe e kemi lakun në fyt nëse nuk punojmë”, tha njëri prej tyre.
Prej 3 ditësh Policia Kufitare është në aksion për verifikimin e mjeteve lundruese dhe ka ndaluar lundrimin e tyre në dete, pas aksidentit tragjik në Potam.
“Bashkohemi me dhimbjen e familjes që humbi vajzën në atë aksident tragjik që është një tragjedi që të gjithë e kuptojnë por si pasojë e saj na kanë bërë një padrejtësi që po na lë pa bukë. Të gjithë ne jemi dëshmitarë. Na u pat urdhëruar që nuk do dilni në det. Unë disponoj mjete me licencë, kemi dokumente përkatës, na vjen policia kufitare dhe ia paraqesim të gjitha dokumentet e mjeteve, të gjithë faturat e prera, listpagesën. Pa asnjë shkresë zyrtare na thonë s’do ikni në punë.
Ne këto 10 ditë presim për të gjithë shpenzimet e vitit. Në fillim s’kishte asgjë të urdhëruar. Shkova në stacionin e policisë në Triport, i çoj të gjithë dokumentacionin, i mbajti shënim të gjitha, çova dhe pagesat e fiskalizuara e më tha je në rregull, vazhdoni punë. Të nesërmen më ndodhi historia e çuditshme. Me 30 të huaj na ndalojnë mjetet e na thonë kemi urdhër. U kthyem. Të nesërmen ishte krimi ekonomik, Interpoli, kufitarja, të gjithë ne si dele i çuam dokumente dhe këta miqtë pa bërë asnjë kontroll i marrin këta dokumente dhe thonë do verifikohen. Po ne çfarë do bëjmë ndërkohë. Kur do verifikohen, në dhjetor. I thamë gjobë maksimale ose burg nëse e meritojmë”, tha një tjetër protestues.
