Mes Drejtorit të Përgjitshëm të Doganave dhe medias News 24 ka ndodhur një përplasje.
Përplasja ka nisur pasi prej 2 ditësh News24 dhe BalkanWeb po publikojnë disa dokumente që hedhin dyshime për implikimin e mundshëm të Gazhelit në emërime të personave me precedentë penalë në sektorë kyçë të doganave.
Sipas shkrimeve drejtori i hetimit në Drejtorinë e doganave Artur Sejati, si dhe për 3 zyrtarë të tjerë të lartë të cilët janë arrestuar në flagrancë në Greqi dhe më pas janë gjykuar nga gjykatat greke për vjedhje, grabitje, kontrabandë dhe grup i strukturuar kriminal janë promovuar në poste të larta.
Ditën e sotme ka reaguar vetë Gazheli i cili akuzon pronarin e mediave Irfan Hysenbelliu për sulm personal pasi biznesi i tij “Birra Tirana” ka marrë gjobë për fshehje të të ardhurave në një shumë të konsiderueshme.
Gazheli në reagimin e tij i bën thirrje Hysenbelliut se nën maskën e medias nuk mund t’i bëjnë shantazh shtetit.
“Irfan Hysenbelliu është betuar që nuk do të m’i falë borxhet që i ka shtetit! Mediat e tij janë hedhur në një sulm personal me shpifje e fyerje personale, sapo “Birra Tirana” ka marrë gjobën e merituar sipas ligjit për fshehje të ardhurash në një shumë të konsiderueshme”, shkruan ndër të tjera Gazheli.
Drejtorit të Doganave i ka dalë në mbrojtje edhe Kryeministri Edi Rama i cili duke shpërndarë reagimin e tij bën pyetjen: “Si luftohet me shpifjen apo qoftë edhe me akuzat legjitime në këtë vend, kur jo vetëm media që shpif apo akuzon, po edhe mediat e tjera s’ia japin të drejtën e fjalës personit publik të akuzuar, nëse ky i fundit flet hapur për një shantazh nga një pronar mediash?!”
