Rusia është në gjendje të garantojë sigurinë energjetike të Evropës me një kosto të arsyeshme për qytetarët e saj, tha të premten zëdhënësi i Kremlinit Dmitry Peskov.
Komentet e tij pasojnë akuzat se Moska ka përdorur furnizimet e saj me gaz për të ushtruar presion politik në kontinent, pasi Gazprom pakësoi rrjedhën e gazit në Gjermani nëpërmjet tubacionit Nord Stream 1 me 60% muajin e kaluar.
“Ne kundërshtojmë plotësisht çdo pretendim apo deklaratë të drejtpërdrejtë se Rusia po përdor gazin ose naftën si një armë presioni politik. Kjo nuk është çështja. Rusia po i përmbush vazhdimisht të gjitha detyrimet e saj dhe Rusia është ende e aftë të garantojë sigurinë e plotë energjetike të Evropës. Rusia është në gjendje të garantojë që taksapaguesit në vendet evropiane nuk do marrin faturat e energjisë elektrike dhe ngrohjes jashtë shkallës si ato që marrin tani.” – u tha Peskov gazetarëve në Moskë.
Më herët, ministri gjerman i Ekonomisë Robert Habeck thuhet se iu lut Kanadasë që të kthejë një turbinë të rëndësishme për tubacionin Nord Stream që ishte dërguar në Montreal për riparime dhe ka mbetur atje për shkak të sanksioneve kundër Rusisë.
Gazprom përmendi këtë çështje si arsye për pakësimin e rrjedhës së gazit në Gjermani. Të premten u raportua se kabineti gjerman kishte marrë ‘sinjale të mira’ nga Kanadaja në lidhje me kthimin e pajisjeve.
Si rezultat i furnizimit të pakësuar me gaz, Berlini u detyrua të nxiste planin e tij emergjent energjetik muajin e kaluar.
Ndërsa qeveria e vendit shpreson të zëvendësojë gazin rus me LNG, media gjermane ka raportuar se plani nuk do të funksionojë sepse nuk ka mjaft cisterna në dispozicion për ta transportuar atë, duke shtuar se vendi mund të përballet me mungesa të mëdha gazi këtë dimër.
