Presidenti Ilir Meta akuzoi kryeministrin Edi Rama se nuk i ka paraqitur asnjëherë një kërkesë për autorizim për çështjen e detit me Greqinë.
Në një konferencë për media, Presidenti Meta tha se që nga ky moment e deri më 24 korrik është i hapur për t’u përgjigjur e për të dhënë sqarime në Kuvend apo në komisionet parlamentare për çështjen e detit mes Shqipërisë dhe Greqisë.
Dalja në konferencë të posaçme publike e Kreut të Shtetit vjen pas deklaratës dhe vizitës së Ministrit të Jashtëm të Greqisë Nikos Dendias i cili tha për mediat greke se çështja do zgjidhet sapo në Shqipëri të zgjidhet Presidenti i ri.
“Një nga çështjet për të cilën kam shmangur maksimalisht debatin publik, edhe kur jam provokuar në mënyrë të qëllimshme, pasi tema është shumë e rëndësishme, është delikate, ka të bëjë me interesa të mëdha, të cilat mund të mbrohen ose të dëmtohen në mënyrë të pakthyeshme. Prandaj, kam preferuar gjithmonë të jem sa më konstruktiv si President, të jem sa më bashkëpunues. Kam dhënë gjithë mbështetjen time Ministrisë së Jashtme, grupit negociator, qeverisë, kryeministrit, këto janë të mirëdokumentuara me të gjitha aktet zyrtare dhe komunikimet që kemi pasur.
Por, siç e shikoni, është e qartë që institucioni më aktiv për zgjidhjen e kësaj çështjeje ka qenë Presidenti i Republikës, institucioni më transparent ka qenë Presidenti, institucioni që i ka kërkuar kryeministrit të bëjë kërkesë për të marrë autorizim dhe për të zhvilluar negociatat politike, përderisa në një moment të caktuar gjatë negociatave që zhvilloheshin, ka qenë dhe një kërkesë e palës tjetër për qasje politike në këtë çështje, dhe përsëri ka qenë Presidenti. Kryeministri është niveli më i lartë politik, mund të marrë këtë përgjegjësi, sepse është një marrëveshje që kalon në Parlament. Është një marrëveshje që nesër mund të shkojë sërish në Gjykatën Kushtetuese dhe është qeveria që duhet t’i dalë për zot. Pra, ajo që ka thënë ministri i Jashtëm i Greqisë, që Presidenti nuk i ka dhënë autorizim kryeministrit, është tërësisht e pavërtetë.
Nuk e paragjykoj, përderisa ka takuar vetëm një palë. Është e drejta e tij t’i referohet vetëm asaj pale. Por, Presidenti është i detyruar për transparencë të bëjë të qartë se nuk ka pasur asnjëherë asnjë kërkesë për autorizim nga kryeministri për këtë çështje. Nuk do doja të flisja më tej për çështjen në fjalë, sepse është një çështje delikate, megjithatë Shqipëria ka Kuvendin e saj, që në çdo rast duhet të mbajë një qëndrim dhe të shprehet. Unë si President që nga ky moment e deri më 24 korrik jam në çdo moment në dispozicion të Shqipërisë, të seancës plenare, të komisionit të jashtëm, komisioneve të tjera, për të bashkëpunuar apo për të dhënë sqarime për të gjitha veprimet që unë kam përmbushur si President në këtë proces”, deklaroi Meta.
Më tej Kreu i Shtetit tha se Presidenti i Republikës nuk është në dijeni nëse midis dy Qeverive apo Kryeministrave është miratuar apo është rënë dakord me ndonjë akt për të ndërprerë, pezulluar apo për të dalë nga negociatat.
“Megjithëse Shqipëria zyrtarisht është në proces të hapur negociatash me Republikën e Greqisë, Presidenti nuk është informuar zyrtarisht nga Qeveria se me çfarë akti, Qeveria ka kaluar nga procesi negociator sipas të drejtës ndërkombëtare, në zhvillime negociatash në nivel politik për këtë çështje.
Në kushte tilla, ligjërisht rezulton se, Kryeministri, apo çdo zyrtar tjetër i Qeverisë nuk është konsultuar, nuk ka kërkuar dhe as nuk është pajisur me ndonjë Autorizim nga Presidenti i Republikës, sipas detyrimit të qartë të vendimit të Gjykatës Kushtetuese nr. 15/ 2010, për të negociuar apo për të diskutuar me Republikën e Greqisë në emër të Republikës së Shqipërisë, në lidhje me çështjen e kufizimit të zonave detare, e aq më pak për të vendosur apo dakordësuar nëse kjo çështje do të shkojë për alternativë në ndonjë nga Gjykatat Ndërkombëtare, ndërkohë që palët ende zyrtarisht janë në negociata“./ Hashtag.al
