Një thatësirë e madhe ka bërë që 24 nga 96 departamentet e Francës të vendosin kufizime në përdorimin e ujit, tha të shtunën Ministria e Tranzicionit Ekologjik të vendit.
Kufizimet variojnë nga thirrjet e thjeshta për të kursyer ujin në disa zona deri në një pakësim më shumë se 50% në bujqësi dhe ndalimet për larjen e makinave, ujitjen e kopshteve dhe mbushjen e pishinave ndër të tjera, tha ministria për ‘Le Figaro’.
Nivelet e reshjeve kanë qenë shumë nën normalen në Francë që nga shtatori 2021, dhe muajin e kaluar deficiti arriti në 25%. Gjendja u përkeqësua nga temperaturat aspak të zakonshme të nxehta në maj, e cila është në rrugën e duhur për t’u bërë më e ngrohta në histori.
Që nga mesi i prillit, tetë departamente franceze u detyruan të vendosin kufizime në përdorimin e ujit, krahasuar me vetëm tre në të njëjtën periudhë të vitit 2021.
“Këtë vit, thatësira ka filluar herët.” – tha kryeministrja e re e Francës Elisabeth Borne në fillim të kësaj jave.
“Ne po marrim hapa për të administruar burimet ujore dhe për të parandaluar që gjendja të dalë jashtë kontrollit këtë verë.” – shtoi ajo.
Autoritetet vendase janë udhëzuar ‘të ruajnë sa më shumë burimet ujore’, tha Borne, duke u bërë thirrje gjithashtu ‘të gjithë francezëve të pakësojnë përdorimin e ujit’.
Kryeministri njoftoi gjithashtu se 400 milionë euro do ndahen për të mbështetur fermerët, të cilëve mund t’u mungojë ushqimi për bagëtinë për shkak të thatësirës.
