Senatorët amerikanë po propozojnë një plan që ka të bëjë me asetet e sekuestruara ruse. Akti RELIEF për Ukrainën po propozohet nga senatori demokrat i Kolorados, Michael Bennet dhe homologu i tij republikan Rob Portman, nga Ohajo, raportoi të martën uebfaqja Axios.
Legjislacioni kërkon që asetet ruse të sekuestruara nga Task Forca e sapo krijuar e Departamentit të Drejtësisë ‘KleptoCapture’ të shndërrohen në një fond ndihme për Ukrainën që do të menaxhohet nga Departamenti i Shtetit.
Njësia u krijua në fillim të marsit për të mbikëqyrur zbatimin e sanksioneve të vendosura nga Uashingtoni ndaj Moskës dhe për ‘të konfiskuar asetet e individëve dhe subjekteve që shkelin këto sanksione’. Ai gjithashtu do të synojë pronën e zotëruar nga biznesmenët rusë, të tilla si avionë, jahte dhe pasuri të paluajtshme, që mund të jenë marrë përmes aktivitetit kriminal.
“Tani për tani, Ukraina po përjeton krizën më të keqe të refugjatëve që nga Lufta e Dytë Botërore. Ata kanë nevojë për ndihmën tonë,” tha Portman, duke shpjeguar nevojën për legjislacionin.
Pothuajse 3.9 milionë njerëz janë larguar nga Ukraina që kur Rusia nisi operacionin e saj ushtarak në vend një muaj më parë, sipas OKB-së.
“Ligji ynë i detyron presidentin rus Vladimir Putin dhe oligarkët rusë të paguajnë çmimin duke siguruar që fondet nga asetet e tyre të sekuestruara të shkojnë drejtpërdrejt për popullin ukrainas për t’i mbështetur ata gjatë shumë viteve të vështira përpara zhvendosjes, rindërtimit dhe rimëkëmbjes,” tha Bennet.
