Pak më herët deputeti socialist Alqi Bllako dorëzoi në Kuvend kërkesën për dorëheqjen nga mandati.
Kjo një ditë pasi SPAK kërkoi nga Kuvendi autorizim për arrestimin e tij si i përfshirë në aferën e inceneratorit të Fierit.
Ndërkohë publikohet letra e tij e dorëheqjes, ku Bllako shkruan se e dorëzon mandatin “me vullnet të plotë”.
Më tej ai shprehet i bindur se në fund të procesit hetimor ndaj tij do të provohet pafajësia.
“Me bindjen e plotë se në fund të këtij procesi do të provohet pafajësia ime, integriteti dhe ndershmëria në detyrën e ushtruar me këtë akt personal vihem në dispozicion të drejtësisë duke gjykuar t’i hap rrugën të pakushtëzuar proceseve të mëtejshme të organeve të drejtësisë”- shkruan Bllako.
Pasditen e sotme është lënë të mbahet mbledhja e Këshillit të Rregullores, Mandateve dhe Imuniteteve për të shqyrtuar kërkesën e SPAK-ut dhe për të hequr imunitetin e Bllakos. Por ai vendosi të hiqte dorë vetë në mënyrë vullnetare, pa pritur Kuvendin t’i heqë imunitetin.