Edhe nëse Perëndimi aktualisht nuk është në gjendje t’i japë Kievit anëtarësimin në NATO, ai duhet të sigurohet që vendi të jetë ‘plotësisht i sigurt’, ka këmbëngulur presidenti ukrainas Volodymyr Zelensky.
“Partnerët tanë, nëse nuk janë të gatshëm ta marrin Ukrainën në NATO, sepse Rusia nuk dëshiron që Ukraina të jetë në NATO, duhet të përpunojnë garanci të përbashkëta sigurie për Ukrainën”, tha Zelensky për Reuters dhe CNN të martën në mes të një pushtimi të vazhdueshëm nga Moska.
Ato ‘garanci sigurie’ nevojiten për të siguruar që ‘integriteti ynë territorial e kufijtë tanë të mbrohen’, sqaroi ai.
Sipas Zelensky, vendet që do të bëhen ‘garantuesit që na japin sigurinë’ duhet të japin ‘ligjërisht’ garanci të tilla për Kievin.
Duke folur nga ajo që Reuters e përshkroi si ‘një kompleks qeveritar shumë i ruajtur’ në kryeqytetin e vendit, udhëheqësi ukrainas ka lavdëruar gjithashtu Perëndimin për dërgimin e armëve në Kiev dhe vendosjen e sanksioneve të reja ndaj Moskës.
Megjithatë, ai u bëri thirrje Shteteve të Bashkuara dhe aleatëve të saj që të bëjnë edhe më shumë, duke përfshirë vendosjen e një zone ndalimfluturimi mbi Ukrainë. Zelensky përsëriti thirrjen për mbylljen e hapësirës ajrore mbi vendin e tij, pavarësisht se pranoi se presidenti i SHBA Joe Biden i kishte thënë më parë se nuk ishte koha për të futur një masë të tillë.
“Kjo nuk ka të bëjë me tërheqjen e vendeve të NATO-s në luftë. E vërteta është se të gjithë prej kohësh janë tërhequr në luftë dhe definitivisht jo nga Ukraina, por nga Rusia,” pohoi ai.
