Departamenti Amerikan i Thesarit i ka thënë guvernatorit republikan të Arizonës që të shfuqizojë dy programe që synojnë shkurajimin e mbajtjes së maskave në shkollë, ose të kthejë mbi 1 miliard dollarë ndihmë federale për Covid-19 dhe të humbasë pjesën tjetër.
Një nismë e quajtur Programi i Përfitimeve të Rimëkëmbjes Arsimore, ofron deri në 7,000 dollarë kupona shkollore për prindërit nëse shkolla e fëmijës së tyre kërkon maska ose karantinë pas ekspozimit ndaj virusit. Udhëzimi federal thotë se nxënësit e shkollës duhet të mbajnë maska në çdo kohë, në mënyrë që të parandalohet përhapja e Covid-19.
“Duke shkurajuar familjet dhe distriktet shkollore që të ndjekin këtë udhëzim, kushtet e përmendura më lart minojnë përpjekjet për të ndaluar përhapjen e Covid-19.” – tha Zëvendës Shefja e Përputhshmërisë e Thesarit, Kathleen Victorino në një letër që u bë publike të premten.
“Rrjedhimisht, këto programe shkollore siç janë strukturuar tani për tani janë përdorime të papërshtatshme.” – të fondeve të ofruara sipas Planit Amerikan të Shpëtimit.
Arizona thuhet se ka marrë rreth gjysmën e 4.2 miliardë dollarëve nga fatura dhe pjesa tjetër do të pritet në prill.
Jo vetëm që Victorino i kërkoi Arizonës të shfuqizonte dy programet brenda 60 ditëve ose të përballet me kthimin e parave të marra tashmë, ajo tha se ‘Thesari mund të mbajë gjithashtu fonde nga kësti i dytë i shtetit të Arizonës derisa Thesari të marrë informacion që konfirmon se çështjet e përshkruara më sipër janë adresuar në mënyrë të përshtatshme.
