Agjencia amerikane e hapësirës NASA ka ndarë mbi 415 milionë dollarë për tre kompani amerikane, përfshirë Blue Origin të Jeff Bezos, për të projektuar stacione private hapësinore dhe destinacione të tjera komerciale në orbitë.
Kompania e Bezos do të marrë 130 milionë dollarë, Nanoracks do të marrë 160 milionë dollarë dhe kompanisë shumëkombëshe të teknologjisë ajrore dhe mbrojtjes Northrop Grumman do t’i jepen 125.6 milionë dollarë.
Në një deklaratë në faqen e saj të internetit, NASA thotë se kërkon të mbajë një prani të SHBA-së në orbitë duke kaluar në platforma të tjera, pasi Stacioni Ndërkombëtar Hapësinor është vendosur të ndërpresë funksionimin deri në fund të dekadës.
Deklarata vazhdon duke shpjeguar se çmimet do të nxisin zhvillimin e stacioneve hapësinore komerciale nga sektori privat që do të jenë të disponueshme si për klientët e qeverisë ashtu edhe të sektorit privat.
“Ne jemi në partneritet me kompanitë amerikane për të zhvilluar destinacionet hapësinore ku njerëzit mund të vizitojnë, jetojnë dhe punojnë, duke i mundësuar NASA-s të vazhdojë të hapë një rrugë në hapësirë për të mirën e njerëzimit duke nxitur aktivitetin tregtar në hapësirë,” tha administratori i NASA-s, Bill Nelson.
NASA tashmë ka partneritet me industrinë private. Kompania hapësinore e Elon Musk, SpaceX, vendos satelitët në orbitë, dërgon ngarkesa dhe së fundmi, nisi një ekuipazh në ISS. Në prill, NASA i dha një kontratë SpaceX për 2.9 miliardë dollarë për të përdorur një raketë të quajtur Starship për të çuar astronautët në Hënë.
