Pesë muaj pas një përplasjeje me armë në Tiranë, ku mbeti i plagosur një 34-vjeçar, është arrestuar i dyshuari Ramadan Shanaj.
Vetëm pak pas ngjarjes së ndodhur më 12 qershor 2021, policia kishte arrestuar në flagrancë vëllanë e tij, Klajdi Shanaj.
Dy vëllezërit janë përplasur me armë zjarri në afërsi të një lokali në rrugën “Kahreman Ylli”, me 33-vjeçarin Valter Pershpalaj, dhe 2 persona të tjerë. Si pasojë e të shtënave me armë, ka mbetur i plagosur në këmbë shtetasi Ergin Gjoni.
Ndaj 25-vjeçarit të arrestuar sot, Gjykata e Shkallës së Parë e Rrethit Gjyqësor Tiranë ka caktuar masën e sigurisë “arrest në burg”, për veprat penale “Vrasja me dashje” mbetur në tentativë kryer në bashkëpunim, “Prodhimi dhe shitja e narkotikëve”, “Prishja e qetësisë publike” dhe “Falsifikimi i letërnjoftimeve, i pasaportave ose i vizave”.
INFORMACIONI I POLICISË
Vijon puna për kapjen e personave të shpallur në kërkim për vepra të ndryshme penale
Kapet dhe ndalohet nga shërbimet e Komisariatit të Policisë Nr. 4, një shtetas i shpallur në kërkim për disa vepra penale.
Në vijim të punës për kapjen e personave në kërkim dhe vënien para përgjegjësisë ligjore, në bazë të informacioneve të marra në rrugë operative, shërbimet e Komisariatit të Policisë Nr. 4 kapën dhe ndaluan shtetasin në kërkim:
-K.Sh., 25 vjeç, banues ne Tiranë, të cilit Gjykata e Shkallës së Parë e Rrethit Gjyqësor Tiranë, i ka caktuar masën e sigurisë “Arrest në burg”, për veprat penale “Vrasja me dashje” mbetur në tentativë, kryer në bashkëpunim, “Prodhimi dhe shitja e narkotikëve”, “Prishja e qetësisë publike” dhe “Falsifikimi i letërnjoftimeve, i pasaportave ose i vizave”.
Ky shtetas, më datë 12.06.2021, në rrugën “Kahreman Ylli”, në afërsi të një lokali, së bashku me vëllain e tij, shtetasin K. Sh. (i arrestuar në flagrancë), janë konfliktuar me armë zjarri me shtetasin V. P., 33 vjeç dhe 2 persona të tjerë. Si pasoje e të shtënave ka mbetur i plagosur në këmbë shtetasi E. Gj.
Materialet kaluan në Prokurorinë e Rrethit Gjyqësor Tiranë, për veprime të mëtejshme.
