Mediet daneze raportojnë se Shërbimi sekret i Danimarkës ndihmoi SHBA-të të spiunonte politikanët evropianë, përfshirë këtu dhe kancelaren gjermane Angela Merkel nga viti 2012 në 2014-ën.
Shërbimi i Inteligjencës së Mbrojtjes (FE) bashkëpunoi me Agjencinë e Sigurisë Kombëtare të SHBA-ve (NSA) për të mbledhur informacion, sipas një raporti nga transmetuesi danez Danmarks Radio.
Inteligjenca u mblodh mbi zyrtarë të tjerë nga Gjermania, Franca, Suedia dhe Norvegjia.
Akuza të ngjashme dolën në vitin 2013. Pastaj, sekretet e zbuluara nga amerikani Edward Snowden treguan se NSA kishte përgjuar telefonin e kancelares gjermane.
Kur u bënë ato akuza, Shtëpia e Bardhë nuk e mohoi plotësisht por tha vetëm se telefoni i zonjës Merkel nuk ishte duke u përgjuar në atë kohë dhe se nuk do të ishte në përgjim as në të ardhmen. Pra më parë mund të jetë përgjuar.
Gjermania është një aleate e ngushtë e SHBA-ve.
Në një raport të ri të ndarë me disa agjenci evropiane të lajmeve, NSA thuhet se ka përgjuar mesazhet me tekst dhe bisedat telefonike të një numri individësh të shquar duke përdorur kabllot daneze të internetit në bashkëpunim me FE-në.
“Operacioni Dunhammer” siç ishte koduar ky operacion, e lejoi NSA-në të merrte të dhëna duke përdorur numrat e telefonit të politikanëve si parametra kërkimi, sipas Danmarks Radio.
Së bashku me zonjën Merkel, ministri i atëhershëm i Jashtëm gjerman Frank-Walter Steinmeier dhe udhëheqësi i opozitës në atë kohë Peer Steinbruck u thanë gjithashtu se ishin në shënjestër.
Ministri i Mbrojtjes i Danimarkës Trine Bramsen, i cili thuhet se ishte informuar më herët për spiunazhin, i tha Danmarks Radio se “përgjimi sistematik i aleatëve të ngushtë është i papranueshëm”.
As FE dhe as NSA nuk kanë komentuar ende mbi raportet e fundit.
Pas lajmeve të fundit të publikuara të dielën, Snowden akuzoi presidentin e SHBA-ve Joe Biden se ishte “përfshirë thellë në këtë skandal herën e parë”. Biden ishte zv.president në kohën kur ndodhi mbikëqyrja e raportuar.
